Búgin Berdaq atındaǵı Qaraqalpaq mámleketlik universitetinde Qırǵızstan Respublikası Qırǵız-túrk Manas universiteti docenti Erdal Aydoğmuştıń qaraqalpaq tilinen túrk tiline awdarmalanǵan miynetleriniń prezintaciyası bolıp ótti.
Dáslep Erdal Aydoğmuş ilaj qatnasıwshılarına ózi haqqında maǵlıwmat berip, qaraqalpaq diyarına kelgeninen hám bul jerdegi alımlar, dóretiwshiler menen bolıp atırǵan sáwbetlesiwden quwanıshlı ekenin aytıp ótti. Qaraqalpaq tilinen turk tiline “Qaraqalpaq xalıq naqıl-maqalları”, Ózbekstan Qaharmanı, Ózbekstan hám Qaraqalpaqstan xalıq shayırı, Ibaryım Yusupovtıń “Kewildegi keń dúnya” poeziyalıq shıǵarmaların toplamı hám Kengesbay Allambergenovtıń 10 nan aslam miynetlerin awdarma qılǵan.
Ilaj dawamında Qaraqalpaq filologiyası hám jurnalistika fakultetinen bir qansha professor-oqıtıwshılar shıǵıp sóyledi hám túrk tiline awdarmalanǵan miynetler boyınsha ózleriniń bir qansha pikir usınısların bildirdi. Sonıń menen birge Erdal Aydoğmuşke qaraqalpaq tiline hám eline bolǵan húrmeti ushın óz aldına minnetdarshılıq bildirilip estelik sawǵaları tapsırıldı.
