Búgin 19-mart kúni Berdaq atındaǵı Qaraqalpaq mámleketlik universitetinde rektorat hám kásiplik awqamı komiteti arasında 2023-2025-jıllarǵa dúzilgen jámáátlik shártnaması bántleriniń 2023-jıldaǵı orınlanıwı máselelerine arnalǵan konferenciya bolıp ótti.

Onda Ózbekstan bilimlendiriw hám ilim xızmetkerleri kásiplik awqamı Qaraqalpaqstan Resapublikası boyınsha juwaplı shólkemlestiriwshisi R.Abduraxmanov, fakultet dekanları, cex baslıqları, professor-oqıtıwshılar, kásiplik awqam belsendileri qatnastı. Konferenciyanı universitet ilimiy isler hám innovaciyalar boyınsha prorektorı I.Turdımambetov ashıp berdi hám basqarıp bardı.

Konferenciyada Qaraqalpaq mámleketlik universiteti rektoratı hám kásiplik awqam komiteti arasında xızmetkerlerdiń sociallıq-ekonomikalıq, huqıqıy máplerin qorǵaw boyınsha 2023-2025-jıllar ushın dúzilgen jámáátlik shártnamasınıń 2023-jılı orınlanıwı haqqında universitetimiz kásiplik awqam komiteti baslıǵı A.Alliyarovtıń esabı tıńlandı.  Bunnan soń, universitettiń oqıw isleri boyınsha prorektorı O.Dúysenbaev sózge shıǵıp búgingi kúnde universitetimiz rektoratı hám kásiplik awqam komiteti arasında 2023-2025-jıllar ushın dúzilgen jámáátlik shártnama arqalı 2023-jıl dawamında mádeniy hám sport ilajları, sonday-aq, hár jılı bayram sánelerinde universitette jumıs alıp barǵan hám islep atırǵan veteran xızmetkerler, aldınǵı professor-oqıtıwshılar hám ziyrek studentlerdiń miynetleri rektorat hám kásiplik awqamı komiteti tárepinen bahalanıp, bir qansha dıqqatqa ılayıqlı jumıslar ámelge asırılıp kiyatırǵanlıǵın aytıp ótti hám aldaǵı jumıslarında tabıslar tiledi. Konferenciyada sózge shıqqan juwapkerler hám kásiplik awqam belsendileri jámáátlik shártnamanıń orınlanıwı boyınsha pikirlerin bildirip, aldaǵı islenetuǵın jumıslar boyınsha usınıslar berdi.

QMU baspasóz xızmeti