Búgin Berdaq atındaǵı Qaraqalpaq mámleketlik universiteti akademik Ch.Abdirov atındaǵı mádeniyat sarayında Qaraqalpaqstan Respublikası Konstituciyasınıń qabıl etilgenliginiń 31 jıllıǵı múnásibeti menen ilaj bolıp ótti. Onda Qaraqalpaqstan Respublikası Joqarǵı Keńesi Baslıǵınıń orınbasarı R.Saparbaev, Qaraqalpaqstan Respublikası sudı baslıǵı, K.Tarixov, Qaraqalpaqstan Respublikası Prokurorı orınbasarı E.Qayıpbergenov hám universitetimizdiń professor-oqıtıwshıları, student-jaslar qatnastı. Ilajdı universitet rektorı A.Reymov ashıp berdi hám basqarıp bardı. Dáslep ilaj Ózbekstan hám Qaraqalpaqstan Respublikalarınıń mámleketlik gimnleri menen baslandı. Bunnan soń, Qaraqalpaqstan Respublikası Joqarǵı Keńesi Baslıǵınıń orınbasarı R.Saparbaev, sózge shıǵıp, bársheni Qaraqalaqstan Respublikası Konstituciyasınıń qabıl etilgenliginiń 31 jıllıǵı menen qızǵın qutlıqlap, xalıqtıń párawanlıǵın támiyinlewde – Konstituciyanıń ornı hám áhmiyeti joqarı ekenligin aytıp ótti.
Sonıń menen birge, ilajda Qaraqalpaqstan Respublikası sudı baslıǵı, K.Tarixov, Qaraqalpaqstan Respublikası Prokurorı orınbasarı E.Qayıpbergenovlar sózge shıǵıp Konstituciya mámlekettiń tiykarǵı nızamı bolıp, hár bir mámlekettiń keleshegi usı hújjette óz sáwleleniwin tabqanlıǵın aytıp, búgin elimizde júz berip atırǵan jańalanıwlar, demokratiyalıq huqıqıy mámleket qurıw, ádil puqaralıq jámiyetin qáliplestiriw jolında erisip atırǵan jetiskenliklerimizdiń barlıǵı Konstituciyada kórsetilgen tiykarǵı principlerdiń turmısqa tolıq engiziliwi menen baylanıslı ekenligin óz bayanatlarında keltirip ótti.
Sonday-aq, Qaraqalpaq mámleketlik universitetiniń «Insan huqıqları, mámleketlik huqıq hám basqarıw» kafedrası docenti, yuridika ilimleri kandidatı X.Kabulov, universitetimizdiń yurisprudenciya baǵdarı 1-kurs studenti E.Sarsenbaeva «Qaraqalpaqstan Respublikası Konstituciyası – «Jaslar siyasatın ámelge asırıwdıń huqıqıy tiykarı» temalarında bayanat jasadı.
Ilaj dawamında Qaraqalpaqstan Respublikası Joqarǵı Keńesi baslıǵınıń orınbasarı R.Saparbaev, Qaraqalpaqstan Respublikası sudı baslıǵı, K.Tarixov, Qaraqalpaqstan Respublikası prokurorı orınbasarı E.Qayıpbergenovlar respublikamız boylap ótkerilip atırǵan “Jasıl mákan” ulıwma milliy joybarı sheńberinde universitetimiz átirapına dekorativ terek nállerin otırǵızıp, Watanımızdı jasıl mákanǵa aylandırıwda bársheni belsendilikke shaqırdı.
QMU baspasóz xızmeti
