Usı jıl 21-fevralda Prezident pármanı menen qabıl etilgen “Ózbekstan – 2030” strategiyasın “Jaslar hám biznesti qollap-quwatlaw jılı”nda ámelge asırıwǵa baylanıslı Mámleketlik baǵdarlamada jaslardıń mashqalaların sheshiw hám potencialın júzege shıǵarıw, olardı talap joqarı bolǵan kásip-ónerge oqıtıw arqalı bántligin támiyinlew boyınsha kóplegen wazıypalar belgilendi.
Usı tiykarda búgin Nókis qalası «Qarataw» mákan puqaralar jıyınında atalıqqa alınǵan jaslardıń mashqala hám usınısların tıńlaw maqsetinde Berdaq atındaǵı Qaraqalpaq mámleketlik universiteti rektorı A.Reymov basshılıǵında universitet jámááti máhállede boldı. Dáslep bul jerde sırtqı miynet migraciyasınan qaytıp kelgen bir qatar jaslar hám olardıń ata-anaları menen ushırastı.
Ushırasıw barısında atalıqqa alınǵan jaslar hám olardıń ata-anaları menen sáwbetlesiw ótkerilip, olardıń turmısında ushırasıp atırǵan mashqalaları tıńlandı hám mashqalalardıń sheshimi boyınsha wazıypalar belgilep alındı.
Sonday-aq, aymaqta járdemge mútáj kem támiynlengen shańaraqlar aǵzalarınan xabar alınıp, azıq-awqat ónimleri berildi.
