Xabarıńız bar 15-22-aprel kúnleri Qaraqalpaq mámleketlik universitetinde “II Oraylıq Aziya Shań” xalıqaralıq konferenciyası ótkeriliwi haqqında aytıp ótken edik.
Usı tiykarda búgin Berdaq atındaǵı Qaraqalpaq mámleketlik universitetinde Aral teńiziniń qurǵaǵan aymaǵında qorshaǵan ortalıqtı qorǵaw máselesine arnalǵan “II Oraylıq Aziya Shań” xalıqaralıq konferenciyasınıń ashılıw máresimi bolıp ótti.
Onda Qaraqalpaqstan Respublikası Joqarǵı Keńesi Baslıǵınıń orınbasarı R.Saparbaev, Qaraqalpaqstan Respublikası Ministrler Keńesi Baslıǵınıń orınbasarı B.Otemuratov, Ózbekstan Respublikası Prezidenti janındaǵı Aralboyı Xalıqaralıq innovaciya orayı direktorı B.Habibullaev hám 80 ge jaqın shet el mámleketlerinen miymanlar qatnastı.
Dáslep konferenciyanı Berdaq atındaǵı Qaraqalpaq mámleketlik universiteti rektorı A.Reymov ashıp berdi. Ol óz shıǵıp sóylewinde Aralboyı aymaǵında ekologiyalıq mashqalalar, sonıń ishinde, suw, topıraq, hawadaǵı shań, ekosistema hám insan salamatlıǵına baylanıslı mashqalalarǵa birge sheshim tabıw, bul baǵdarda Qaraqalpaq mámleketlik universiteti sırt elli shólkemler hám ilimpazlar menen birge islesiwge tayar ekenligin aytıp ótti.
Bunnan soń, Qaraqalpaqstan Respublikası Joqarǵı Keńesi Baslıǵınıń orınbasarı R.Saparbaev sózge shıǵıp, Aral mashqalaların saplastırıw, xalıqtıń turmıs sharayatın jaqsılaw baǵdarında ámelge asırılǵan keń kólemli jumıslar hám alda turǵan áhmiyetli wazıypalarǵa toqtap ótti.
Konferenciyada universitettiń ilimiy isler hám innovaciyalar boyınsha prorektorı I.Turdımambetov Qaraqalpaq mámleketlik universitetine studentlerdi qamtıp alıw, bul jerde studentler hám magistrantlardıń oqıp bilim alıw ushın jaratılǵan sharayatlar, professor-oqıtıwshılar, studentler tárepinen alıp barılıp atırǵan ilimiy izertlew jumısları boyınsha maǵlıwmatlar berip ótti.
Sonday-aq, konferenciya dawamında Biologiya fakulteti dekanı Ya.Ametov Qubla Aral boyı regionı antropogen landshaftındaǵı qus ekologiyası tolıq úyrenilmegenligi, sol sebepli Qubla Aralboyı antropogen landshaftları ornitofaunasına ıqlım faktorlarınıń tásirin hár tárepleme úyreniw zárúr ekenligin óz bayanatında keltirip ótti.
Bul konferenciyanıń tiykarǵı maqseti dúnya ilim jámiyetshiliginiń Aral teńizi boyındaǵı suw, topıraq, ekosistema, qorshaǵan ortalıq hám insan salamatlıǵına baylanıslı mashqalalardı birgelikte sheshiwge bolǵan itibarın tartıw bolıp tabıladı. Maǵlıwmat ushın “II Oraylıq Aziya Shań” xalıqaralıq konferenciyası 22-aprel kúnine shekem dawam etedi.
QMU baspasóz xızmeti
