Berdaq atındaǵı Qaraqalpaq mámleketlik universiteti, Shet tilleri fakultetinde belgili ustaz Nurımbetova Gulayim Ametovnanıń 70 jıllıq yubileyine baǵıshlanǵan ushırasıw keshesi bolıp ótti. Onda ilimpazlar, professor-oqıtıwshılar, nuraniylar, student-jaslar hám ǵalaba xabar qurallarınıń wákilleri qatnastı. Ushırasıwdı Shet tilleri fakulteti dekanı Dj.Kurbanbaev alıp bardı. Keshede sózge shıqqanlar ustazdıń miynetlerin ayrıqsha maqtanısh penen atap, onıń múbárek 70 jası menen qutlıqladı.

Maǵlıwmat ushın; Nurımbetova Gulayim Ametovna 1954-jıldıń 30-aprelde Nókis qalasında zıyalılar shańaraǵında tuwılǵan. 1971-1976 jıllarında Qaraqalpaq mámleketlik pedagogikalıq institutınıń Roman-german filologiyası fakultetinde oqıp, tabıslı pitkergen. 1976-jıldan baslap Nókis mámleketlik universitettiń  Shet tilleri kafedrasında inglis tili muǵallimi sıpatında óziniń pedagogikalıq iskerligin baslaydı. 1980-1982 jıllarda Leningrad mámleketlik universitetinde stajer-izertlewshi hám sońınan 1983-1985-jılları sol universitte Eksperimental fonetika hám shet tillerin oqıtıw metodikası kafedrasında aspiranturada oqıydı. Aspiranturanı tabıslı tamamlap, 1985-jılı Leningrad qalasında 10.02.19 – «Ulıwma til bilimi, sociolingvistika, psixolingvistika»  qánigeligi boyınsha «Сингармонизм характеристики фонологического слуха (по данным восприятия гласных в каракалпакском, киргизском и узбекском языках)» temasında kandidatlıq dissertaciyasın  tabıslı jaqladı.