Usı jıldıń 4-may kúni Tashkent qalasındaǵı Dóretiwshiler baǵı»nda Berdaq atındaǵı Qaraqalpaq mámleketlik universiteti jámááti, universitetimiz belsendi student-jasları tárepinen qaraqalpaq ádebiyatında óshpes iz qaldırǵan Qaraqalpaq xalqınıń kórnekli wakilleri Berdaq Ǵarǵabay ulı, Ájiniyaz Qosıbay ulı, Ibrayim Yusupov, Tólepbergen Qayıpbergenovlardıń ómir jolı hám dóretiwshilik shıǵarmalarınan tayarlanǵan «Sahra búlbilleri ataǵın alǵan jazıwshı hám shayırlar» atamasında koncert baǵdarlaması shólkemlestirildi. Onda Ózbekstan Jazıwshılar awqamı aǵzaları, jazıwshılar, shayırlar Tashkent qalasındaǵı bir qatar JOOnan miymanlar hám student-jaslar qatnastı.
Ilajda Berdaq atındaǵı Qaraqalpaq mámleketlik universitetiniń rektorı A.Reymov sózge shıǵıp, ilaj qatnasıwshılarına qaraqalpaq klassikalıq ádebiyatınıń tiykarshıları Berdaq Ǵarǵabay ulı, Ájiniyaz Qosıbay ulı, Ibrayim Yusupov, Tólepbergen Qayıpbergenovlardıń, dóretiwshilik jolları, biybaha ádebiy miyrasları, olardıń ádebiyatımız rawajlanıwına qosqan úlesleri haqqında jıynalǵanlarǵa keń túrde maǵlıwmatlar berdi. Bunnan soń, «Dóretiwshiler baǵı»nda universitettiń talantlı student-jasları tárepinen qosıq-namalar, ayaq oyınları, milliy qol óneri dóretpeleri, xudojnikler kórgizbesi, hám «Hurliman» xalıq ansambli tárepinen ullı babalarımızdıń ómir jolları hám dóretiwshilikleri boyınsha tayarlanǵan muzıkalı-saxnalıq kórnisleri jıynalǵanlar názerine usınıldı.
Ilaj dawamında miymanlar, jazıwshılar, shayırlar hám student-jaslar qaraqalpaq ádebiyatına óz úlesin qosqan Berdaq Ǵarǵabay ulı, Tólepbergen Qayıpbergenov, Ibrayım Yusupov esteliklerine gúller qoyıp, olardıń islegen qayırlı isleri hám keleshek áwladqa qaldırǵan biybaha ádebiy miyrasları yadqa alındı. Bunday ilajdı ótkeriwdegi tiykarǵı maqset – keleshek áwladtı Ana-Watanǵa, xalıqqa, muhabbat hám sadıqlıq ruwxında tárbiyalaw, tuwısqan xalıqlar arasında doslıq qarım-qatnasların rawajlandırıw hám ósip kiyatırǵan jaslarǵa ullı babalarımızdıń ádebiy miyrasların túsindiriw, olardıń dóretiwshiliklerin xalqımız arasında jánede keńnen úgit-násiyatlaw bolıp tabıladı.
QMU baspasóz xızmeti
