9-may – Eslew hám qádirlew kúni. Bul kúni ekinshi jer júzilik urısta watan ushın janın bergen qaharmanlar, eli ushın pidayılıq penen xızmet etip búgingi kúnde ráhmetli dúnyaǵa sapar shekken ata-babalarımız eske alınadı, olardıń qábirlerine gúller qoyılıp, ruwxlarına quran tiláwat etiledi. Al, aramızda jasap atırǵan sol jalınlı jıllardıń tiri gúwası bolǵan insanlar bolsa qádirlenip, olarǵa húrmet-izzet kórsetiledi.

Mine, usınday húrmetli insanlardıń biri, ekinshi jer júzilik urısta sanitar bolıp xızmet etken, sol jalınlı jıllardıń jańǵırıǵına aylanǵan veteran anamız – Karnishina Mariya Ivanovna bolıp esaplanadı. Mariya apa 1929-jılı Ukrainada tuwılǵan. 1944-jılı armiyaǵa qabıl etilgen hám Ullı watandarlıq urısqa sanitar sıpatında qatnasqan. 1094-sanlı áskeriy bólimdi urıstan evakuaciya qılıwda emlewxanada pidayılıq penen xızmet etken. Ol urısta jaralanǵanlarǵa járdem berip, talay-talay áskerlerdi ólimnen aman alıp qalıp, jeńiske óz úlesin qosqan. Urıs tamam bolǵannan keyin Kostropol qalasında pochta bóliminde islegen. 1946-jılı Nókiste Ishki isler ministrliginde xatker mashinist bolıp islegen. Keyin basqa lawazımlarda da jumıs alıp barǵan. 1976-jılı jumıs ornı ózgergeni sebepli Tashkent qalasında jumıs islegen. Házirgi waqıtta Mariya Ivanovna Nókis qalasında aqlıǵı menen jasaydı.

Búgin, 7-may kúni sáne múnásibeti menen bizler kásiplesimiz Gúlzira Esboganova hám Tariyx, sociologiya qánigeliginiń studentleri menen jawınger apamızdıń úyine bardıq. Apanıń awhalınan xabar aldıq.

Baxıtgúl Esemuratova,

Qaraqalpaq mámleketlik universiteti

Tariyx fakultetiniń tyutorı