Búgin 15-may kúni Berdaq atındaǵı Qaraqalpaq mámleketlik universitetinde taraw qánigeleriniń qatnasıwında korrupciyaǵa qarsı gúresiw máselesine arnalǵan ilaj ótkerildi. Onda Qaraqalpaqstan Respublikası joqarı sudı sudiyası M.Bayniyazov, Qaraqalpaqstan Respublikası Prokuraturası aǵa prokurorı R.Jalǵasbaev, Qaraqalpaqstan Respublikası IIM tergew basqarması tergewshisi A.Sarıbaev, QR Ádillik ministrliginiń ministr máslátshisi N.Berdiniyazova, Qaraqalpaqstan Respublikası MQX nen wákiller sonday-aq, universitettiń barlıq prorektorları, fakutet dekanları, kafedra baslıqları hám student-jaslar qatnastı. Ushırasıwdı universitettiń oqıw isleri boyınsha prorektorı O.Dúysenbaev ashıp berdi hám alıp bardı.

Ilajda sózge shıqqanlar, Húrmetli Prezidentimizdiń jaslarǵa zaman talabına muwapıq tálim beriw, usı maqsette orta hám joqarǵı oqıw orınlarınıń materiallıq-texnikalıq bazasın túpten jaqsılaw, oqıtıwshılar hám ustazlarǵa múnásip miynet shárayatların jaratıwǵa ayrıqsha itibar qaratılıp atırılǵanın, bunıń negizinde bilimlendiriw tarawında korrupciyanı pútkil joq etiw ekenligin aytıp ótti. Sonıń menen birge, korrupciya hár qanday mámleket hám jámiyettiń siyasiy ekonmikalıq rawajlanıwına keri tásirin kórsetip, insan huqıq hám erkinlikleriniń ayaq astı bolıwına alıp keletuǵınlıǵın, bunday jamman illetke qarsı gúresiw maqsetinde kóplep nızam hújjetler qabıl etilip, bir qansha ilajlar ámelge asırılıp atırılǵanlıǵın aytıp ótti.

Ushırasıwdı ótkeriwden tiykarǵı maqset «Ózbekstan Respublikasında Korruaciyaǵa qarsı gúresiwge qaratılǵan reformalar» haqqında maǵlıwmatqa iye bolıw, solar qatarı korrupciyaǵa qarsı gúresiwge qaratılǵan mámleketlik siyasat, kúsheyttirilgen jınayiy juwapkershilik, korrupcion xabarlarǵa berilip atırılǵan xoshametler, tarawdaǵı ashıq-áshkaralıq hám mámleketlik dásturlerdiń orınlanıwı haqqında keń jámiyetshilikke maǵlıwmatlar beriw bolıp tabıladı.