Xabarıńız bar, usı jıldıń 17-18 may kúnleri Xojeli rayonında «Mızdaxqan muqaddes hám sırlı mákan» atlı xalıqaralıq festivalı bolıp ótti. Onda sırt elli miymanlar ilimpazlar bir qatar delegaciya aǵzaları qatnastı.

Festival sheńberinde búgin Tınıshlıq ushın Nobel sıylıǵınıń laureatı Professor Rae Kwon Chung hám delegaciya aǵzaları Berdaq atındaǵı Qaraqalpaq mámleketlik universitetinde bolıp, universitettiń professor-oqıtıwshıları, doktarantları magistranları hám student-jasları menen ushırastı.

Dáslep miymanlardı universitettiń oqıw isleri boyınsha prorektorı O.Dúysenbaev hám Xalıqaralıq birge islesiw boyınsha prorektorı T.Nurımbetovlar kútip aldı hám studenler tárepinen islengen milliyligimizdi sáwlelendiretuǵın hár qıylı kórgizbeler, qol ónerleri úlgileri menen tanıstırdı.

Bunnan soń, Nobel sıylıǵınıń laureatı Rae Kwon Chung ushırasıw qatnasıwshıları menen qorshaǵan ortalıqqa zıyansız tómen uglerodlı “jasıl” ekonomikaǵa ótiw sonday-aq, ekonomikanıń barlıq tarmaqlarında resurslardı únemlewdi ele de keńeytiw baǵdarında sáwbetlesiw alıp bardı. Sáwbetlesiw barısında student-jaslar ózleriniń qızıqtırǵan sorawlarına juwaplar aldı.

QMU baspasóz xızmeti