Korrupciya mashqalası búgingi kúnde jámiyettiń rawajlanıwına tosqınlıq etetuǵın tiykarǵı faktorlardıń biri esaplanadı. Bunday jaman illetti boldırmaw hám salamat turmıs tárizin qáliplestiriw, dámegóyshilik hám korrupciyanıń aldın alıw, usıǵan baylanıslı huqıqbuzarlıqlardıń kelip shıǵıwına sebep bolıp atırǵan jaǵdaylar hám olardı saplastırıw, jámiyetlik salamat ortalıqtı qáliplestiriw maqsetinde búgin, Berdaq atındaǵı Qaraqalpaq mámleketlik universitetinde barlıq prorektorlar, fakultet dekanları, dekan orınbasarları, kafedra baslıqlar hám bólim xızmetkerleri qatnasında úgit násiyat ilajı bolıp ótti. Onda QR prokuraturası bólim prokurorı G.Begjanova, QR prokuraturası bólim prokurorı L.Seytovalar qatnastı.

Ilajda universitettiń rektorı A.Reymov sózge shıǵıp, elimizde ámelge asırılıp atırǵan reformalardıń nátiyjeliligin jáne de arttırıw, jámiyetimiz rawajlanıwı ushın korrupciyaǵa baylanıslı huqıqbuzarlıqlardıń aldın alıw, olardı anıqlaw hám toqtatıw, buǵan imkan beriwshi sebeplerdi saplastırıw boyınsha respublika boylap keń kólemli jumıslar ámelge asırılıp atırǵanlıǵın atap ótti. Sonday-aq, korrupciya – rawajlanıw tosıǵı ekenligi, korrupciya hár qanday mámleket hám jámiyettiń siyasiy-ekonomikalıq rawajlanıwına úlken zıyan kórsetetuǵınlıǵı, mámlekettiń konstituciyalıq tiykarların hám nızam ústinligi, sonıń menen birge insan huqıqları hám erkinlikleriniń támiyinlenbewine alıp keletuǵınlıǵı, sol sebepli mámleketimizde korrupciyaǵa qarsı gúresiwdiń anıq sisteması jaratılǵanlıǵı, bul boyınsha kóplegen qararlar, pármanlar, nızamlar qabıl etilip atırǵanlıǵın aytıp, bársheni bul jaman illetke qarsı gúresiwde biyparwa bolmawǵa shaqırdı.