Aldın xabar bergenimizdey, Berdaq atındaǵı Qaraqalpaq mámleketlik universiteti tárepinen 2024/2025 oqıw jılı ushın usı jıldıń 5-13-iyul kúnleri aralıǵında kásiplik (dóretiwshilik) imtixanlarınıń ótkeriliwi boyınsha keste tastıyıqlanǵan edi. Usı kestege muwapıq búgin Dene mádeniyatı tálim baǵdarı boyınsha Nókis qalası 1-sanlı sport mektebinde (Manej) azanǵı saat 06:00de kásiplik (dóretiwshilik) imtixanları ótkerilmekte.
Kásiplik (dóretiwshilik) imtixanları ótkeriletuǵın orınlarda abiturientler hám olardıń ata-anaları ushın barlıq qolaylıqlar jaratılǵan. Sonıń menen bir qatarda imtixan ótkeriletuǵın orınlar kameralar menen támiyinlengen bolıp, internet arqalı tuwrıdan tuwrı onlayn rejimde baqlap barıw imkaniyatı da jolǵa qoyılǵan.
Bul imtixanlardı ótkeriw waqtında jámiyetshilik qadaǵalaw, imtixanlardı ádil hám ashıq-aydınlıqtı támiyinlew, nızam talapların saqlaǵan halda ótkeriw maqsetinde imtixanlarǵa Ózbekstan Respublikası Joqarı bilimlendiriw, ilim hám innovaciyalar ministrliginen bir qatar wákiller qatnaspaqta. Haqıyqatında da ádil hám ashıq-aydınlıq tárizde ótkerilip atırǵan imtixanlar haqıyqıy óz bilimi hám sporttaǵı joqarı sheberligi bar jaslar ushın jáne bir jaqsı imkaniyat bolıp tabıladı.
Maǵlıwmat ushın Berdaq atındaǵı Qaraqalpaq mámleketlik universitetinde 2024-2025-oqıw jılı ushın kásiplik (dóretiwshilik) imtixanları usı jıldıń 13-iyul sánesine shekem (13-iyul kúni de )dawam etedi.
QMU Baspasóz xızmeti.
