Xabarıńız bar, Qaraqalpaqstan Respublikası aymaǵında usı jıldıń 1-31-iyul kúnleri aralıǵında «Kiber mádeniyattı arttırıw aylıǵı» kompleksli úgit-násiyat ilajların shólkemlestiriw belgilendi. Usı tiykarda búgin Berdaq atındaǵı Qaraqalpaq mámleketlik universitetinde “Kiberjınayatshılıqqa qarsı gúresiw” atamasında ushırasıw bolıp ótti.

Onda Ózbekstan Respublikası Ishki isler ministrligi Kiber qáwipsizlik orayı juwapker wákili J.Erkinov, Qaraqalpaqstan Respublikası Kiber qáwipsizlik bólimi baslıǵı D.Seytmuratov, Qaraqalpaqstan Respublikası Joqarı bilimlendiriw, ilim hám innovaciyalar ministrligi bas qánigesi Z.Dauletnazarovalar hám Nókis qalasındaǵı barlıq joqarı oqıw orınlarınan juwapkerler qatnastı.

Sońǵı jıllarda kiberjınayatı sanı kóbeyip, ózgelerdiń plastik kartasındaǵı qarjılardı ózlestiriw, sociallıq tarmaqlar arqalı zıyanlı viruslar tarqatıw, informaciyalıq hújimler, onlayn sawda maydanındaǵı aldawshılıqlar sıyaqlı jaǵdaylar jiyi ushıraspaqta.

Bunday jaǵdaylardıń aldın alıw hám olardı boldırmaw maqsetinde taraw qánigeleri tárepinen ushırasıw qatnasıwshılarına ámelge asırılıp atırǵan jumıslar, kiberjınayatshılıqtıń huqıqıy aqıbetleri haqqında maǵlıwmatlar berilip, aldaǵı birgelikte islenetuǵın jumıslar belgilep alındı. Ushırasıw qatnasıwshıları kún tártibindegi másele boyınsha ózlerin qızıqtırǵan sorawlarǵa juwap aldı.