Aldın xabar bergenimizdey, Berdaq atındaǵı Qaraqalpaq mámleketlik universiteti Yuridika fakultetiniń Ferǵana alabındaǵı pitkeriwshi studentlerine Ferǵana qalasında saltanatlı túrde diplom tapsırıw máresimi bolıp ótti.

Onda Ózbekstan Respublikası Prezidenti másláhátshisiniń orınbasarı Q.Sariev, Ferǵana wálayatı Ishki isler basqarması baslıǵı A.Ikramov, Berdaq atındaǵı Qaraqalpaq mámleketlik universiteti rektorı A.Reymov, universitettiń Yuridika fakulteti professor-oqıtıwshıları, pitkeriwshi jaslar hám olardıń ata-anaları qatnastı. Saltanatlı ilajdı  Ferǵana mámleketlik universiteti rektorı B.Shermuhammadov alıp bardı.

Ilajda sózge shıqqanlar sońǵı jılları elimizde húrmetli Prezidentimizdiń bilimlendiriw tarawına qaratıp atırǵan itibarı, ásirese jaslarǵa kórsetip atırǵan ǵamqorlıqları, olardıń oqıwı, bilim alıwı, kásip-óner úyreniwi ushın mámleketimiz tárepinen alıp barılıp atırǵan nátiyjeli jumıslar haqqında aytıp ótti.

Bunnan soń, barlıq pitkeriwshi jaslardı universitetti tabıslı tamamlap atırǵanlıǵı menen qutlıqlap, olarǵa bakalavr diplomların saltanatlı túrde tapsırdı.

Maǵlıwmat ushın; pitkeriwshilerdiń kópshiligi bunnan tórt jıl burın shet el mámleketlerindegi joqarı oqıw orınlarında yuridika fakultetlerindegi sırtqı bólimlerinde oqıp, Húrmetli Prezidentimiz baslaması menen bul jaslar Qaraqalpaq mámleketlik universitetiniń yuridika fakultetinde oqıwdı dawam ettirdi hám bakalavr diplomın qolǵa kirgizdi.

QMU baspasóz xızmeti