Búgin, 19-avgust kúni Ózbekstan Respublikası Joqarı bilimlendiriw, ilim hám innovaciyalar ministri Qońıratbay Sharipov Qaraqalpaqstan Respublikasına xızmet saparı sheńberinde Berdaq atındaǵı Qaraqalpaq mámleketlik universitetinde bolıp, bul jerde Qaraqalpaqstan Respublikasındaǵı barlıq joqarı oqıw orınları basshıları menen ushırastı.
Onda joqarı oqıw orınlarınıń rektor hám direktorları, prorektorlar sonday-aq, juwaplı xızmetkerler qatnastı. Ushırasıwdı Qaraqalpaqstan Respublikası Joqarı bilimlendiriw, ilim hám innovaciyalar ministri B.Qayıpbergenov alıp bardı.
Dáslep Joqarı bilimlendiriw, ilim hám innovaciyalar ministri Qońıratbay Sharipov sózge shıǵıp, máleketimizde sońǵı jılları bilimlendiriw tarawına qaratılıp atırǵan itibar nátiyjesinde, tarawdıń materiallıq-texnikalıq bazasınıń bekkemleniwi, sonday-aq, oqıtıwshılar hám ustazlarǵa múnásip miynet shárayatların jaratıwǵa ayrıqsha itibar qaratılıp atırılǵanın atap ótti.
Bunnan soń, ushırasıwda barlıq joqarı oqıw orınları basshılarına taza oqıw jılın joqarı dárejede baslaw, oqıw processin durıs shólkemlestiriw, studentlerdi turaq jay menen támiyinlew, bul baǵdarda jol qoyılıp atırǵan kemshilikler hám de aldaǵı ámelge asırılıwı tiyis bolǵan wazıypalar boyınsha bir qatar tapsırmalar berildi.
QMU Baspasóz xızmeti
