Búgin 20-sentyabr kúni Berdaq atındaǵı Qaraqalpaq mámleketlik universitetinde 2024-2025 oqıw jılında 1-kursqa qabıl etilgen student-jaslarǵa gúwalıq tapsırıw máresimi bolıp ótti. Onda Qaraqalpaqstan Respublikası Joqarǵı Keńesiniń komitet baslıǵı T.Romanov, universitet professor-oqıtıwshılar, fakultet dekanları, student-jaslar, olardıń ata-anaları hám ǵalaba xabar quralları wákilleri qatnastı. Dáslep ilaj Ózbekstan hám Qaraqalpaqstan Respublikalarınıń mámleketlik gimnleri menen baslandı.
Ilajda universitet rektorı A.Reymov sózge shıǵıp, 2024/2025 oqıw jılında Berdaq atındaǵı Qaraqalpaq mámleketlik universitetine oqıwǵa qabıllanıp, student bolıw baxıtına miyassar bolǵan student-jaslardı hám olardıń ata-anaların qutlıqlap, universitetke qádem qoyǵan bul studentler keleshekte elimizdiń rawajlanıwına óz úlesin qosıwı, jetik qánigeler bolıp jetilisiwi ushın universitette barlıq sharayatlar jaratılǵanın atap ótti. Sonıń menen birge, Húrmetli Prezidentimizdiń 213-sanlı tariyxıy pármanı boyınsha qaraqalpaqstanlı jaslarǵa kórsetip atırǵan atalarsha ǵamxorlıǵı nátiyjesinde bıyılǵı jılda da respublikamızdıń qala hám rayonları ushın zárúr bolǵan mamanlıqlar sanınan hám kadrlardıń ishki mútájliklerinen kelip shıǵıp, 10 000 qosımsha kvota ajıratılǵanlıǵı sonnan 968 student Berdaq atındaǵı Qaraqalpaq mámleketlik universitetine qabıl etilgenligin aytıp, jaslarǵa usınday imkaniyatlardı jaratıp berip atırǵan Húrmetli Prezidentimizge óz minnetdarshılıqların bildirdi.
Bunnan soń, Qaraqalpaqstan Respublikası Joqarǵı Keńesiniń komitet baslıǵı T.Romanov sózge shıǵıp, mámleketimizde bilimlendiriw tarawın rawajlandırıw boyınsha ámelge asırılıp atırılǵan jańa reformalar, sonday-aq, mámleketimiz tárepinen jaslarǵa berilip atırılǵan usınday keń múmkinshiliklerden únemli paydalanıp, aldaǵı waqıtları elimiz tınıshlıǵı, xalqımız párawanlıǵı jolında ayanbay xızmet etetetuǵın kadrlar bolıp jetilisiwine isenim bildirdi. Ilajda joqarı ball toplaplaǵan student-jaslarǵa studentlik gúwalıqları tapsırılıdı hám universitet jámááti tárepinen tayarlanǵan koncert baǵdarlaması menen dawam etti.
Maǵlıwmat ushın; 2024/2025 oqıw jılında Berdaq atındaǵı Qaraqalpaq mámleketlik universitetiniń bakalavriatınıń kúndizgi, sırtqı hám keshki tálim baǵdarlarına jámi 5112 kvota ajıratılıp sonnan 1203 mámleketlik grant, 3912 kvota tálemli kontrakt tiykarında ajıratılǵan bolsa, qosımsha Húrmetli Prezidentimizdiń 213-sanlı Pármanı menen 968 jas Berdaq atındaǵı Qaraqalpaq mámleketlik universitetine oqıwǵa qabıl etildi.
QMU baspasóz xızmeti
