Aldın xabar bergenimizdey, usı jıldıń 12-sentyabr kúni Ózbekstan Respublikası Prezidentiniń 2024-jıl 1-apreldegi «Dóretiwshilik mektepleriniń jumısın bunnan bılay da jetilistiriw ilajları haqqında»ǵı PQ-147-sanlı qararına tiykar Berdaq atındaǵı Qaraqalpaq mámleketlik universiteti tárepinen paytaxtımızdaǵı Ibrayım Yusupov atındaǵı dóretiwshilik mektebinde «Ajiniyaz shıǵarmaları bilimdanı» atamasında 9-10-11-klass oqıwshıları arasında Qaraqalpaq tili hám ádebiyatı pán olimpiadası ótkerilgen edi.

Búgin usı pán olimpiadası jeńimpazların sıylıqlaw maqsetinde Berdaq atındaǵı Qaraqalpaq mámleketlik universiteti rektorı A.Reymov Ibrayım Yusupov atındaǵı dóretiwshilik mektebinde boldı. Dáslep universitet rektorı A.Reymov sózge shıǵıp, jeńimpazlardıń bilim hám umtılısları arqalı joqarı nátiyjelerge eriskenin ayrıqsha atap ótip, olardı hesh qashan bilim alıwdan toqtamawǵa, óz maqsetlerine erisiw jolında jáne bir márte bilim alıwǵa shaqırdı. Sonday-aq, jaslardıń joqarı shıńlarǵa tek ǵana bilim alıw, óz ústinde islew hám izleniw arqalı erisiledi dep atap ótti.

Sonıń menen birge, universitet administraciyası mektep jámáátiniń ilimiy hám dóretiwshilik jumısların qollap-quwatlaw baǵdarında óz jumısların dawam ettiretuǵınlıǵı, bunday olimpiadalar jas áwladtıń intellektuallıq hám dóretiwshilik qábiletlerin júzege shıǵaratuǵınlıǵın aytıp ótti. Bunnan soń rektor A.Reymov pán olimpiada jeńimpazların qızǵın qutlıqlap, olarǵa diplom hám estelik sawaǵaların tapsırdı.

QMU baspasóz xızmeti