Búgin Berdaq atındaǵı Qaraqalpaq mámleketlik universitetiniń akademik Ch.Abdirov atındaǵı mádeniyat sarayında «1-oktyabr – Muǵallimler hám ustazlar kúni» múnásibeti menen «Bayramıńız múbárek, áziz ustazlar» atamasında koncert baǵdarlaması bolıp ótti. Onda universitet professor-oqıtıwshılar, student-jaslar qatnastı.

Ilajda universitet rektorı A.Reymov sózge shıǵıp, barlıq muǵallim hám ustazlardı bayram menen qutlıqladı. Ol óz sózinde bilimlendiriw tarawınıń pidayıların keleshek jaratıwdaǵı ornın ayrıqsha atap ótip, olardıń jaslarǵa tálim-tárbiya beriwdegi úlken úlesin joqarı bahaladı.

Bayram baǵdarlamasınıń eń dıqqatqa ılayıq bólegi professor-oqıtıwshılar tárepinen atqarılǵan muzıkalıq shıǵıwlar boldı. Professor-oqıtıwshılar tárepinen hár qıylı xalıq hám zamanagóy qosıqlar atqarıldı, bul bolsa jıynalǵanlarǵa haqıyqıy bayram keypiyatın inám etti. Ásirese, jıllar dawamında jas áwladqa bilim bergen hám olardı kamalǵa keltirgen húrmetli muǵallimler tárepinen atqarılǵan dástúriy qosıqlar tamashagóylerge ózgeshe zawıq baǵıshladı.

Bunnan soń, ilaj universitet rektoratı tárepinen paytaxtımızdaǵı payızlı orınlarınıń birinde «1-oktyabr – Muǵallimler hám ustazlar kúni» múnásibeti menen shólkemlestirilgen bayram dasturxanı hám koncert baǵdarlaması menen dawam etti.

QMU baspasóz xızmeti