Ilim – imkániyatlar bar jerde ǵana óz jemisin beredi. Bul jolda Qaraqalpaq mámleketlik universiteti rektoratı tárepinen bir qatar múmkinshilikler jaratıp berilmekte. Solar qatarında sırt eller menen birge islesiwdi mısal keltiriwimiz múmkin. Usı jıldıń 23-oktyabr kúni Ulıwma biologiya hám fiziologiya kafedrası baslıǵı, professor A.Matchanov baslaması menen Biologiya fakultetinde Lomonosov atındaǵı Moskva mámleketlik universiteti Fundamental meditsina fakulteti, Fiziologiya hám patologiya kafedrası baslıǵı b.i.d., professor  Tarasova Olga Sergeevna qatnasında ilimiy seminar bolıp ótti. Ilimiy seminardı Biologiya fakulteti dekanı b.i.d., professor Ya.Ametov alıp bardı. Ilajǵa professor-oqıtıwshılar, doktorantlar, magistrantlar hám student-jaslar qatnastı. Házirgi waqıtta Fiziologiya hám patologiya kafedrası baslıǵı b.i.d., professor Tarasova Olga Sergeevna fakultetimiz talabalarına taza metodika tiykarında sabaq ótip atır. Studentler jańa bilim kónlikpe hám tájiriybege iye bolmaqta. Ilimiy tájiriybe almasıwdiń tiykarǵı maqseti Moskva qalasınıń tájiriybesin úyreniw, laboratoriya úskenelerinde islew, jańa ilim izertlew jumısları menen tanısıw hám birge islesiwdi jolǵa qoyıw bolıp tabıladı. Sırt el joqarı oqıw orınları menen birge islesiw tek ǵana tájiriybe bolıp ǵana qoymastan, jańa oylap tabıwlarǵa tiykar saladı.