Xabarıńız bar, Húrmetli Prezidentimizdiń 2024-jıl 16-iyulde “Ataqlı qaraqalpaq shayırı hám oyshılı Ájiniyaz Qosıbay ulı tuwılǵanlıǵınıń 200 jıllıǵın keń nıshanlaw haqqında”ǵı arnawlı qararı tastıyıqlandı. Usı qarardıń orınlanıwın támiyinlew maqsetinde búgin 26-oktyabr kúni Berdaq atındaǵı Qaraqalpaq mámleketlik universitetinde «Ájiniyaz – qaraqalpaq ádebiyatınıń maqtanıshı» (XIX ásir qaraqalpaq klassik shayırı Ájiniyaz Qosıbay ulınıń tuwılǵanına 200 jıl) atamasındaǵı xalıqaralıq ilimiy-teoriyalıq konferenciya shólkemlestirildi. Oǵan sırt el mámleketlerden, sonıń menen birge, respublikamızda jumıs alıp barıp atırǵan joqarı oqıw orınları, ilimiy-izertlew oraylarınan professorlar, alımlar, doktorantlar, izleniwshiler hám student-jaslar qatnastı.
Konferenciyanı universitet rektorı Axmed Reymov qutlıqlaw sózi menen ashıp berdi hám alıp bardı. Ol óz shıǵıp sóylewinde Ájiniyaz Qosıbay ulı óziniń biytákirar hám mazmunlı dóretiwshiligi menen xalqımızdıń mádeniyatı hám ádebiyatın rawajlandırıw, jas áwladtı watansúyiwshilik hám iygilikli ideyalar ruwxında tárbiyalawda úlken áhmiyetke iye ekenligin aytıp ótti.
Bunnan soń, Qaraqalpaqstan Respublikası Joqarǵı Keńesiniń komitet baslıǵı Tajibay Romanov shıǵıp sóylep, qaraqalpaq klassik shayırı Ájiniyaz Qosıbay ulınıń tuwılǵanına 200 jıl tolıwı múnásibeti menen respublikamız húkimeti atınan qızǵın qutlıqlap, konferenciya jumıslarına tabıslar tiledi. Koferenciyada sózge shıqqanlar húrmetli Prezidentimizdiń baslaması menen xalqımızdıń súyikli shayırı Ájiniyaz Qosıbay ulınıń 200 jıllıǵı YuNESKO sheńberinde xalıqaralıq kólemde belgilenetuǵın yubileyler qatarına kirgizilgenligin atap ótti.
Sonıń menen birge, konferenciyada shayırdıń ómiri hám dóretiwshiligi, shıǵarmalarınıń tek ǵana qaraqalpaq ádebiyatı emes, sonıń menen birgelikte, ózbek, qazaq, túrkmen hám basqa da túrkiy xalıqlar jáne dúnya ádebiyatında tutqan ornı, XIX ásirdegi qaraqalpaq ádebiyatınıń rawajlanıwında Ájiniyaz dóretiwshiliginiń áhmiyeti, búgingi kúnde onıń shıǵarmalarınıń úyreniliwi hám keleshek áwladlarǵa jetkeriliwi sıyaqlı máseleler haqqında maǵlıwmatlar berildi. Konferenciya sheńberinde Berdaq atındaǵı Qaraqalpaq mámleketlik universiteti jámááti hám bir qatar talantlı student-jaslar tárepinen tayarlanǵan koncert baǵdarlaması menen dawam etti.
QMU baspasóz xızmeti
