Búgin 13-noyabr kúni Berdaq atındaǵı Qaraqalpaq mámleketlik universitetinde Xalıqaralıq Túrkiy akademiyasınıń baslaması menen Ájiniyaz Qosıbay ulınıń 200 jıllıǵı qarsańında onıń tańlamalı shıǵarmalarınıń túrk hám ázerbayjan tillerine awdarmalanǵan kitaplarınıń prezentaciyası bolıp ótti. Onda Túrk Akademiyasınıń prezidenti Shain Majidovich Mustafaev, Turkiya Xadji Bayram Vali universitetiniń professorı Huseyn Yildirim, Muxammed Fizuliy atındaǵı qol jazbalar institutı ilimiy bóliminiń bas qánigesi, f.i.d. Názákát Mámmádli hám Qazaqstan, Qırǵızstan, Ázerbayjan, Túrkiya mámleketlerinen kelgen ilimpazlar, alımlar qatnastı.
Ilajdı Berdaq atındaǵı Qaraqalpaq mámleketlik universiteti rektorı, akademik Axmed Reymov ashıp berdi hám alıp bardı. Ol óz shıǵıp sóylewinde Ózbekstan Respublikası Prezidentiniń 2024-jıl 16-iyuldegi “Ataqlı qaraqalpaq shayırı hám oyshılı Ájiniyaz Qosıbay ulı tuwılǵanlıǵınıń 200 jıllıǵın keń nıshanlaw haqqında”ǵı arnawlı qararı tiykarında respublikamız boylap keń kólemli ilajlar bolıp atırǵanlıǵı sonday-aq, Ájiniyaz Qosıbay ulınıń biytákirar hám mazmunlı dóretiwshiligi xalqımızdıń mádeniyatı hám ádebiyatın rawajlandırıw, ásirese jas áwladtı watansúyiwshilik hám iygilikli ideyalar ruwxında tárbiyalawda úlken áhmiyetke iye ekenligin aytıp ótti. Bunnan soń, túrk hám ázerbayjan tillerine awdarmalanǵan kitaplardıń lentaların qıyıp, usı kitaptı awdarmalawda úles qosqan bárshe insanlarǵa óz minnendarshılıǵın bildirdi.
Sonday-aq, ilajda Túrk Akademiyasınıń prezidenti Shain Mustafaev sózge shıǵıp, «Óz shıǵarmalarında túrkiy xalıqlardıń birligin jırlaǵan kórnekli shayır Ájiniyazdıń 200 jıllıǵı qarsańında onıń doretiwshiligin jańlatıwǵa úles qosqanınan quwanıshlı ekenligin bildirdi.
Sonıń menen birge, ilajda sózge shıqqanlar shayır Ájiniyaz Qosıbay ulınıń ómir jolı, dóretiwshiligi hám túrk hám ázerbayjan tillerine awdarmalanǵan kitaplar haqqında ózleriniń unamlı pikirlerin bildirdi. Ilaj dawamında Xalıqaralıq Túrkiy akademiyası tárepinen usı kitaptı awdarmalaǵan insanlarǵa arnawlı serifikatlar tapsırdı.
QMU baspasóz xızmeti
