Búgin 14-noyabr kúni Berdaq atındaǵı Qaraqalpaq mámleketlik universitetinde rus tili hám ádebiyatı kafedrasınıń úlken oqıtıwshısı, mehriban ustaz, tájiriybeli dilmash, «Qaraqalpaq mámleketlik universitetiniń Xabarshısı» jurnalınıń juwaplı redaktorı “Qaraqalpaqstan xalıq bilimlendiriw aǵlası” Tursınmuratov Madreyim Tursınmuratovichtiń 80 jıllıq yubileyine arnalǵan ilaj bolıp ótti. Onda professor-oqıtıwshılar, student-jaslar, ustazdıń, jaqınları hám shákirtleri sonday-aq, ǴXQ wákilleri qatnastı.
Ilajdı Berdaq atındaǵı Qaraqalpaq mámleketlik universiteti rektorı, akademik Axmed Reymov ashtı hám basqarıp bardı. Ol óz sózinde Madreyim Tursınmuratovtıń mámleketlik hám jámiyetlik jumıslarǵa úlken juwapkershilik penen qaraytuǵın sonday-aq, óz isiniń haqıyqıy pidayısı ekenligin sonlıqtan onı tek ǵana universitet jámááti emes, al respublika aldında úlken abıroy-itibarǵa iye insan ekenligin ayrıqsha atap ótti. Ilajda Qaraqalpaqstan Respublikası Joqarı bilimlendiriw, ilim hám innovaciyalar ministrliginiń sektor baslıǵı B.Qalımbetov qatnasıp, ustazdıń 80 jıllıq yubileyi menen ministrlik atınan qızǵın qutlıqlap, estelik sawǵaların tapsırdı.
Bunnan soń, sózge shıqqanlar tárepinen ustazdıń ómir jolı, alıp barǵan jumısları, qolǵa kirgizgen nátiyjeleri hám tabısları haqqında jıynalǵanlarǵa keń túrde maǵlıwmatlar berildi.
Maǵlıwmat ushın; ustaz Madreyim Tursınmuratov búgingi kúnde Berdaq atındaǵı Qaraqalpaq mámlektlik universiteti rus tili hám ádebiyatı kafedrasınıń úlken oqıtıwshısı, universitettiń «Xabarshısı» jurnalınıń juwaplı redaktorı bolıp jumıs alıp barmaqta. Ol óziniń 55 jıldan aslam ilimiy-pedagogikalıq iskerligi dawamında kóplegen shákirt tayarlap, jer júzi kórkem ádebiyatı menen Qaraqalpaq milliy kórkem ádebiyatınıń úlgilerin násiyatlawda, en jaydırıwda tınımsız miynet islegen pidayı insan. Onıń Qaraqalpaqstanda hám Tatarstanda úlken qızıǵıwshılıq oyatqan «Qaraqalpaq áheńleri» qosıqlar ciklin qaraqalpaq tiline awdarıwı hám onıń jarıq kóriwi respublikmızdıń mádeniy turmısındaǵı ájayıp waqıyalardıń birine aylandı.
Usı orında bizde universitet jámááti pútkil ómirin jáhán, rus, ózbek, qaraqalpaq ádebiyatların úgit-násiyatlawǵa baǵıshlap kiyatırǵan keń peyil insan, haqıyqıy ádebiyatshı múǵallim hám ilimpaz Madreyim Tursınmuratovichti 80 jıllıq yubileyi menen qızǵın qutlıqlap, ustaǵa uzaq ómir, bekkem densawlıq shańaraǵına amanlıq tileymiz.
QMU baspasóz xızmeti
