Búgingi kúni elimizde ilim hám bilimlendiriw tarawın rawajlandırıwǵa ayrıqsha itibar qaratılmaqta. Ásirese sırt el joqarı oqıw orınları menen birge islesiw Memorandumı tiykarında oqıw-metodikalıq, ilim-izertlew hám tájiriybe almasıw jumısları ámelge asırılmaqta. Usınday joqarı oqıw orınlarınıń biri Qazaqstan Respublikasınıń Shımkent qalasında jaylasqan Muxtar Auezov atındaǵı Qubla-Qazaqstan universiteti bolıp, bul universitet Qazaqstandaǵı Top 1000 lıqqa kirgen eń kúshli universitetlerdiń biri esaplanadı. Usı jıldıń 11-23 noyabr kúnleri Biologiya fakulteti dekanı, biologiya ilimleri doktorı, professor Yakub Ametov hám Ulıwma biologiya hám fiziologiya kafedrası docenti, PhD Muratbay Begjanovlar Muxtar Auezov atındaǵı Qubla-Qazaqstan universitetinde xızmet saparında boldı. Xızmet saparınan gózlengen tiykarǵı maqset – Top 1000 lıqqa kirgen universitet studentlerine lekciya oqıw arqalı Qaraqalpaq mámleketlik universitetiniń reytingin joqarılatıw bolıp tabıladı. Sonday-aq bul universitettiń biotexnologiya, ekologiya hám biologiya kafedraları menen tájiriybe almasıw, oqıw, ilim-izertlew jumısların bekkemlew hám rawajlandırıwdan ibarat.
Xızmet saparınıń dáslepki kúni jerleslerimiz Universitettiń akademiyalıq máseleleri boyınsha prorektorı, professor Qurmanǵalı Sarkulov, «Ximiyalıq injeneriya hám Biotexnologiya» joqarı mektebiniń dekanı, docent Murat Aytureev, sonday-aq, «Biotexnologiya» kafedrası baslıǵı, docent Guljayna Alpamısovalar menen ushırastı. Ushırasıwda eki universitet professor-oqıtıwshıları, talabaları, magistrant hám doktorantları arasında akademiyalıq mobillikti jolǵa qoyıw, oqıw hám ilimiy jumıslardı rawajlandırıw boyınsha hám aldaǵı islenetuǵın jumıslar haqqında kelisip aldı. Bunnan soń Yakub Ametov hám Muratbay Begjanovlar 2-3 kurs studentlerine «Mikrobiologiya» hám «Ekologiya» pánlerinen sabaq ótti.
Xızmet saparınıń keyingi kúnlerinde «Biotexnologiya» kafedrasınıń oqıw hám ilimiy laboratoriyaları menen tanıstı. Ol jerde laboratoriya baslıqları menen ushırasıp, alıp barılıp atırǵan ilimiy jumıslar, onıń bólimleri haqqında jaqınnan tanıstı. Bunnan soń, Yakub Ametov hám Muratbay Begjanovlar «Biologiya hám geografiya» kafedrası baslıǵı, biologiya ilimleri kandidatı, docent Isaev Erjan Bolısbekulı hám «Ekologiya» kafedrası baslıǵı w.a., professor Iztleuov Gani Moldakulovich sonday-aq, bul kafedralardıń professor-oqıtıwshıları menen ushırastı. Ushırasıwda bul kafedralardıń oqıw hám ilim-izertlew iskerligi, oqıw hám ilimiy laboratoriyaları menen jaqınnan tanıstı. Sonday-aq, kafedralar arasında akademiyalıq mobillikti jolǵa qoyıw, oqıw hám ilimiy jumıslardı rawajlandırıw, atap aytqanda birgelikte oqıwlıq hám oqıw qollanbalardı, ilimiy maqalalardı baspadan shıǵarıw, birgelikte ilimiy joybarlardı orınlaw sıyaqlı áhmiyetli jumıslar haqqında kelisip alındı.
Bunnan tısqarı xızmet saparı dawamında xalıq-aralıq forum hám ilimiy seminarlarda qatnasıp, Qaraqalpaq mámleketlik universiteti iskerligi hám jetiskenlikleri haqqında keń túrde tanıstırıp ótti. Solay etip Qaraqalpaq mámleketlik universiteti Biologiya fakulteti professor oqıtıwshılarınıń xızmet saparı óz juwmaǵına jetti. Eki universitet arasında islenip atırǵan bul jumıslar keleshekte óz jemisin berip Qaraqalpaq mámleketlik universitetiniń gúllep rawajlanıwına, universitetimizdiń jáhán universitetileri arasında aldıńǵı orınlarǵa shıǵıwına isenemiz.
Amet Xabibullaev
Qaraqalpaq mámleketlik universiteti
Biologiya fakulteti ilimiy isler
boyınsha dekan orınbasarı, PhD., docent
