Búgin Berdaq atındaǵı Qaraqalpaq mámleketlik universitetinde «1-dekabr Qaraqalpaq tiline mámleketlik til biyligi berilgenine 35 jıl tolıwı» múnásibeti menen universitet mádeniyat sarayında “Ana tilim – altın ǵáziynem” atamasında bayram keshesi bolıp ótti. Onda universitettiń professor-oqıtıwshıları, student-jasları qatnastı. Dáslep ilaj Ózbekstan hám Qaraqalpaqstan Respublikalarınıń mámleketlik gimnleri menen baslandı.
Bayram keshesin universitettiń Jaslar máseleleri hám ruwxıy-aǵartıwshılıq isleri boyınsha prorektorı S.Alawatdinov ashıp berdi hám bárshe ilaj qatnasıwshıların bayram menen qızǵın qutlıqladı. Sonday-aq, keshede Qaraqalpaqstan Respublikası Joqarǵı Keńesi deputatı T.Romanov sózge shıpıp, jıynalǵanlardı bayram menen qutlıqladı hám jaqındaǵana bolıp ótken joqarı oqıw orınları arasında ǵalabalıq diktant tańlawı jeńimpazlarına estelik sawǵaların tapsırdı.
Bunnan soń, Qaraqalpaq til bilimi kafedrası professorı Q.Paxratdinov «Qaraqalpaq ádebiy tiliniń rawajlanıwı» haqqında bayanat jasadı. Sonıń menen birge, ilaj universitettiń student-jasları tárepinen 1-dekabr Qaraqalpaq tiline mámleketlik til biyligi berilgenligine 35 jıl tolıwı múnásibeti menen tayarlanǵan koncert baǵdarlaması menen dawam etti.
Haqıyqatında da, til xalıqtıń ǵáziynesi, ata miyrası. Ana tili – biziń eń dáslep úyrengen sózlerimiz, alǵashqı túsiniklerimiz hám birinshi sezingen tuyǵılarımız… Anamızdıń háyyiwi, kempir apamızdıń sıyqırlı ertekleri, atamızdıń biybaha násiyatları negizinde ol sanamızǵa sińgen. Hár bir ápiwayı sózdiń tiykarında millettiń ásirlik tarıyxı, ómirlik filosofiyası, dúnyaǵa kózqarasları, mádeniyatı sáwlelenedi. Til – tiri jan. Onda tariyx, búgin hám keleshek janlanadı. Ol ǵamxorlıq etiwdi, asırap-abaylawdı talap etedi. Sebebi tildiń qádirsizleniwi hám joǵalıwı – millettiń joǵalıwına alıp keledi. Til – ózligimiz. Shayır I.Yusupov sózi menen aytqanda: «Ana tilim sen basqadan ayırmam».
Insan qansha kóp tillerdi bilse de óziniń quwanıshın, qayǵısın, saǵınıshın, jek kóriwshiligin ana tilinde bayanlaydı. Jaqının joǵaltsa ana tilinde joqlaw aytadı, baxıttan másligin ish-ishinen sezingeninde shúkirshilikti óz tilinde bildiredi. Mine tildiń qan-qanımızǵa, ruwxımızǵa sińgenliginiń kórinisi. Til -biz tuwılǵannan yaǵnıy besikten qábirge shekem janımızda bolatuǵın joldasımız, júregimiz benen qosa urıp turadı ol. Til uzaq ásirlerden berli jańlap kiyatırǵan, ullı ruwxıy – gimnimiz.
Milliy baylıǵımız sanalǵan ana tilimiz – Qaraqalpaq tili de 1989-jılı 1-dekabrde dúnyadaǵı barlıq rásmiy tiller qatarı mámleketlik til biyligin aldı. «Qaraqalpaq tili – Qaraqalpaqstan Respublikasınıń mámleketlik tili». Bul sózlerdi aytqanımızda qálbimiz óz-ózinen súyispenshilik, maqtanısh sezimlerine toladı.
QMU baspasóz xızmeti
