Berdaq atındaǵı Qaraqalpaq mámleketlik universitetiniń Tariyx fakulteti tárepinen Ilimpaz hám pedagog Qaraqalpaqstan Respublikasında tariyx iliminiń rawajlanıwına hám Joqarı bilimlendiriw salasında pedagog kadrlardı tayarlawda belgili dárejede óziniń úlesin qosqan tariyx ilimleriniń kandidatı, docent etnograf alım Aynazar Ótemisovtıń 90 jıllıǵına arnalǵan eslew keshesi shólkemlestirildi.
Onda Qaraqalpaq mámleketlik universitetiniń professor-oqıtıwshıları qatnastı. Kesheni Tariyx fakulteti dekanı S.Sulaymanov ashıp berdi hám alıp bardı. Ilajda universitet professorları B.Abdikamalov, B.Qoshanovlar etnograf alım A.Ótemisovtıń tariyx iliminde tutqan ornı, onıń ómiri hám ilimiy miynetleri haqqında bayanatlar jasadı.
Aynazar Ótemisov 1934-jılı Qaraózek rayonı (burıngı Taxtakópir rayonı) házirgi Qaraózek shirket xojalıǵınıń «Samat» degen awılında diyqan shańaraǵında tuwıladı. 1953-jılı 10-klasstı pitkergennen keyin Samarqand qalasındaǵı Alisher Nawayı atındaǵı Ózbek mámleketlik universitetiniń tariyx fakultetine oqıwǵa kiredi, onı 1958-jılı pitkerip shıqqannan keyin Qaraózek rayonındaǵı I.V.Stalin atındaǵı orta mektepte tariyx páninen muǵallim hám rayonlıq xalıq bilimlendiriw bóliminde metodist bolıp jumıs isleydi. 1959-jılı aprel ayınan baslap Ózbekstan Respublikasınıń siyasiy hám ilimiy bilimlerdi tarqatıw jámiyetiniń Qaraqalpaqstan bóliminde inspektor- metodist lawazımında jumıs isleydi.
Ol 1960-jıl fevral ayınan baslap Ózbekstan Ilimler Akademiyasınıń Qaraqalpaqstan filialınıń N.Dawqaraev atındaǵı tariyx, til hám ádebiyat institutınıń arxeologiya hám etnografiya sektorında kishi ilimiy xızmetker bolıp jumıs isleydi hám 1965-1998- jıllarda etnografiya qánigeligi boyınsha Ózbekstan Ilimler akademiyasınıń tariyx institutında aspiranturada oqıp óziniń dissertaciyalıq ilimiy jumısın dáslep tariyx iliminiń kandidatı L.S.Tolstova, keyin tariyx ilimleriniń doktorı U.X.Shalekenovtıń basshılıǵında alıp baradı. Aspiranturanıń waqtı pitkennen keyin N.Dawkaraev atındaǵı tariyx, til hám ádebiyat institutınıń etnografiya sektorında dáslep kishi, keyin aǵa ilimiy xızmetker lawazımında islep ilim-izertlew jumısların alıp baradı. Ol 1971-jılı «Túslik Aral jaǵalawlarındaǵı balıqshılardıń turmısı hám mádeniyatı» (XIX ásirdiń aqırı XX arnawlı qánigelesken kenesinde «Tariyx ilimleriniń kandidatı» degen ásirdiń 60-jılları) degen temada Tashkenttegi tariyx institutınıń ilimiy dárejeni alıw ushın dissertaciyasın jaqladı.
