Búgin 10-yanvar kúni Berdaq atındaǵı Qaraqalpaq mámleketlik universiteti rektorı, akademik Axmed Reymov universitettiń Málimleme resurs orayında bolıp, ol jerde oqıw dáwirinde hám qısqı imtixanlar aldınan studentlerge kitap oqıw ushın jaratılǵan sharayatlar, oqıw ádebiyatları hám sırt el ádebiyatları menen támiyinlengenlik jaǵdayların kózden ótkerdi. Onda universitettiń barlıq prorektorları qatnastı.

Dáslep rektor A.Reymov oraydıń oqıw zalları, elektron kitapxana, oqıw ádebiyatları fondı hám sırt el ádebiyatları fondı iskerligi menen tanıstı.  Ol jerde studentlerge jaratılǵan qolaylıqlar, sonıń ishinde, zamanagóy texnologiyalardıń islew processi, joqarı tezliktegi internet hám interaktiv xızmetler haqqında Málimleme resurs orayı direktorı R.Qalmurzaeva tárepinen tolıq maǵlıwmat berildi. Sonday-aq, rektor oqıw resurslarınan nátiyjeli paydalanıw boyınsha usınıslar berdi.

Sonıń menen birge, rektor A.Reymov hám prorektorlar Málimleme resurs orayı xızmetkerleri menen ushırasıp, olardıń jumısı, studentler ushın jaratılǵan imkaniyatlardı keńeytiw boyınsha alıp barılıp atırǵan jumıslar hám keleshektegi rejeler haqqında sáwbetlesti. Atap aytqanda, sırt el ádebiyatı fondın bunnan bılay da bayıtıw, elektron resurslardan paydalanıwdı keńeytiw hám studentler arasında kitapqumarlıq mádeniyatın arttırıw boyınsha pikir alısıldı.

Rektor óziniń shıǵıp sóylegen sózinde qısqı imtixanlar dáwirinde studentlerdiń bilim dárejesin arttırıwda kitap hám oqıw resurslarınıń áhmiyetin ayrıqsha atap ótti. Ol studentlerge jaratılǵan bunday sharayatlardan nátiyjeli paydalanıwǵa shaqırıp, universitet basshılıǵı tárepinen bul baǵdarda hár tárepleme járdem beriletuǵının atap ótti. Ilaj sońında rektor Málimleme resurs orayı xızmetkerleriniń pikir-usınısların tıńlap, olardıń talaplarına sáykes túrde oraydıń jumısın bunnan bılay da jetilistiriw boyınsha prorektorlarǵa zárúr tapsırmalar berdi.