Hár jılı 11-yanvar sánesi “Xalıq aralıq qorıqxanalar hám milliy baǵlar kúni” sıpatında belgilep kelinedi. Bul sáne 1997-jılda jabayı haywanatlardı qorǵaw orayı hám dúnya júzlik jabayı tábiyat fondı usınısı menen qorǵalatuǵın tábiyiy aymaqlar sistemasın rawajlandırıw, tábiyiy ortalıqtı asrap-abaylaw, haywanat hám ósimlik dúnyasınıń kóplegen túrleri, sonıń ishinde joq bolıp baratırǵan túrlerdi qorǵaw hám qayta tiklew máselelerine keń jámiyetshiliktiń itibarın qaratıw maqsetinde belgilenedi.
Usı sáne múnásibeti menen 11-yanvar kúni Biologiya fakultetinde ilimiy seminar shólkemelstirildi. Ilimiy seminarǵa “Sudoche-Aqpetki” buyırtpa qorıqxanası, “Tómengi Ámiwdárya mámleketlik biosfera rezervatı”, “Aralboyı milliy tábiyat baǵı” “Saygachiy” kompleks landshaft buyırtpa qorıqxanası qánigeleri hám de Biologiya fakultetiniń professor oqıtıwshıları, doktorantlar, magistrantlar hám student-jaslar qatnastı.
Seminar dawamında qánigeler, professor-oqıtıwshılar óz bayanatları menen qatnasıp, kúnniń áhmiyeti, búgingi kúnde bul tarawda alıp barılıp atırǵan jumıslar, Qaraqalpaqstan shárayatında biologiyalıq kóp-túrlilik jaǵdayı, ilimiy izzertlew jumısların alıp barıw ushın jaratılǵan shárt-sharayatlar, tarawdaǵı ózine tán kemshilikler, báhárgi hám gúzgi sanaq dáwirindegi esap-sanaqlar haqqında qızıqlı maǵlıwmatlardı aytıp ótti. Seminar sońında qatnasıwshılar ózlerin qızıqtırǵan sorawlarına juwaplar aldı. Ilaj kóterińki ruwıxta soraw-juwaplar menen qızıqlı túrde bolıp ótti.
Biologiya fakulteti “Ekologiya hám topıraqtanıw”
kafedrası assistenti; Aygerim Naǵashıbayeva
