Usı jıldıń 13-yanvar kúni Berdaq atındaǵı Qaraqalpaq mámleketlik universitetinde student-jaslardıń tálim-tárbiyası menen baylanıslı áhmiyetli máselelerdi dodalawǵa baǵıshlanǵan májilis bolıp ótti. Ilajda universitettiń Jaslar máseleleri hám ruwxıy-aǵartıwshılıq isleri boyınsha prorektorı S.Alawatdinov, rektor másláhátshisi T.Aytmuratov, fakultet dekanları, dekan orınbasarları, tyutorlar qatnastı.
Májilisti universitet rektorı A.Reymov kiris sóz benen ashıp, jaslar tárbiyası hám olardıń ruwxıy jetilisiwin támiyinlew mámleketimiz siyasatınıń tiykarǵı baǵdarlarınan biri ekenin atap ótti. Ol óziniń shıǵıp sóylegen sózinde jaslardıń hár tárepleme rawajlanıwı, olar ushın jaratılıp atırǵan imkaniyatlar hám sharayatlardıń áhmiyeti haqqında sóz etti. Ilaj dawamında rektorı A.Reymov tómendegi tiykarǵı máselelerge itibar qarattı:
Studentlerdiń tálim-tárbiyası: Jaslardı milliy qádiriyatlar tiykarında tárbiyalaw, olarda watansúyiwshilik, milliy ózlik hám ruwxıy qádiriyatlarǵa húrmet ruwxında tárbiyalawdı atap ótti. Bul baǵdarda universitette ámelge asırılıp atırǵan ruwxıy-aǵartıwshılıq jumıslar haqqında tolıq maǵlıwmat berdi. Sonıń menen birge, jaslardıń bos waqtın mazmunlı shólkemlestiriw: Studentler ushın sport dógerekleri, dóretiwshilik, ilimiy hám texnikalıq sheńberlerdi keńeytiw arqalı olardıń bos waqıtların nátiyjeli ótkeriw máselesi dodalandı. Sonday-aq, bul baǵdarda universitette shólkemlestirilgen dógerekler jumısı mısal etip keltirildi.
????Bunnan soń, studentler arasında huqıqbuzarlıqtıń aldın alıw, nızamlarǵa ámel etiw hám salamat turmıs tárizin úgit-násiyatlaw máseleleri dodalandı. Ilaj juwmaǵında qatnasıwshılar tárepinen bildirilgen pikirler hám usınıslar tiykarında jaslar tálim-tárbiyası boyınsha ilajlar rejesi islep shıǵılıwı belgilendi. Universitet rektorı májilis qatnasıwshıların jaslardıń bilim alıwına, ruwxıy rawajlanıwına hám olar ushın salamat ortalıq jaratıwǵa ayrıqsha itibar qaratıwǵa shaqırdı. Bul májilis universitet jámááti hám student-jaslar ushın áhmiyetli bolıp, tálim-tárbiya tarawında nátiyjeli islesiw ushın jańa baǵdarlardı belgilep berdi.
QMU baspasóz xızmeti
