Búgin, 15-yanvar kúni Berdaq atındaǵı Qaraqalpaq mámleketlik universitetinde jańadan zamanagóy tiptegi 400 orınlıq studentler turaq jayınıń paydalanıwǵa tapsırılıwına arnalǵan saltanatlı ilaj bolıp ótti. Onda Qaraqalpaqstan Respublikası Joqarǵı Keńesi komiteti baslıǵı Murat Atamuratov, Joqarı bilimlendiriw, ilim hám innovaciyalar ministriniń orınbasarı Sarvarxon Buzrukxonov, Qaraqalpaqstan Respublikası Ministrler Keńesi baslıǵınıń orınbasarı Bayram Ótemuratov, universitet jámááti, nuranıylar, professor-oqıtıwshılar, student-jaslar hám ǵalaba xabar quralları wákilleri qatnastı.
Dáslep ilaj aldınan Qaraqalpaqstan Respublikası Joqarǵı Keńesi komiteti baslıǵı Murat Atamuratov shıǵıp sóylep, Húrmetli Prezidentimiz basshılıǵında jas áwladtıń bilim alıwı, sociallıq qorǵawı, olardıń keleshekte kámil insanlar bolıp jetilisiwi ushın barlıq sharayatlar jaratılıp atırǵanlıǵı, ásirese, bilimlendiriw tarawına qaratılıp atırǵan itibar, sonıń ishinde studentlerdi jataqxana menen támiyinlew máselesine ayrıqsha itibar qaratılıp atırǵanlıǵın aytıp, bársheni jańa imarattıń ashılıw menen qızǵın qutlıqladı. Sonday-aq, ilajda Joqarı bilimlendiriw, ilim hám innovaciyalar ministriniń orınbasarı Sarvarxon Buzrukxonov sózge shıǵıp, bul iri joybardıń áhmiyetine toqtalıp ótti. Ol óz sózinde jańa studentler turaq jayı zamanagóy arxitekturalıq standartlar tiykarında qurılǵanlıǵın, onda studentler ushın barlıq qolaylıqlar jaratılǵanlıǵın aytıp, bársheni jańa studentler turaq jayınıń ashılıwı menen qızǵın qutlıqladı.
Bunnan soń, “ELLIKQALA MAXSUS QURILISH” JShJ niń direktorı G.Satimov tárepinen jańadan boy tiklegen studentler turaq jayınıń gilti Qaraqalpaq mámleketlik universiteti rektorı A.Reymovqa saltanatlı túrde tapsırıldı. Ilaj dawamında kelgen miymanlar studentler turaq jayınıń sharayatları menen tanısıp ol jerdegi student-jaslar menen bir dasturqan átirapında sáwbetlesti. Haqıyqatında da bul mámleketimizde jaslarǵa jaratılıp atırǵan qolaylı sharayatlar, bilimlendiriw sistemasın bunnan bılay da jetilistiriw hám studentlerdiń turmıs sapasın jaqsılaw baǵdarında alıp barılıp atırǵan keń kólemli reformalardıń jáne bir ayqın mısalı bolıp tabıladı.
Maǵlıwmat ushın; bul paydalanıwǵa tapsırılǵan studentler úyiniń qurılıs jumısları ushın universitet byudjetten tısqarı qarjı esabınan 22 662 825 745,60 sum qarjı ajıratılıp, “ELLIKQALA MAXSUS QURILISH” JShJ niń tájiriybeli qurılısshılar tárepinen qısqa múddette hám sapalı etip pitkerildi. Sonday-aq, zamanagóy studentler turaq jayı 400 orınǵa mólsherlengen bolıp, ol jerde studentler ushın mebel úskeneleri, zamanagóy elektr pechleri, muzlatqıshlar, kir juwıw mashinaları, mikrotolqınlı pechler, suw ısıtıw úskeneleri sıyaqlı turmıslıq texnikalar menen támiyinlengen.
Sonıda ayrıqsha aytıp ótiw kerek 2025-jılı studentler turaq jayı menen támiyinlew maqsetinde Qaraqalpaq mámleketlik universitetinde mámleketlik jeke menshik sheriklik tiykarında jáne 400 orınǵa mólsherlengen bir studentler turaq jayı imaratı paydalanıwǵa tapsırıladı. Bul óz gezeginde studentlerdi jataqxana menen qamtıp alıw dárejesin 50% ke shekem arttıradı. Studentler turaq jayında student jaslarımızdıń sabaqtan bos waqıtların mazmunlı ótkeriwi, dem alıwı, qosımsha dógereklerge qatnasıwı, bilim alıwı ushın barlıq sharayatlar jaratılǵan. Prezidentimiz tárepinen alǵa súrilgen 5 baslamanı studentlerimiz arasında ǵalaba en jaydırıw maqsetinde zamanagóy málimleme texnologiyaları, kompyuter xanaları, málimleme resurs orayı kórkem ónerge qızıǵıwshı jaslar ushın barlıq qolaylıqlarǵa iye dógerekler, sonıń menen birge awqatlanıw, juwınıw, internet tarmaǵınan paydalanıw, gazeta jurnalların oqıw, televizor tamasha etiw ushın barlıq sharayatlar jaratılǵan.
QMU baspasóz xızmeti
