Усы жылдың 24-сентябрь күни тарийх факультетинде «Мәдениятымыздың жети журтқа саяхаты» атамасында мәдений илаж шөлкемлестирилди.
Илажды факультет деканы С.Сулайманов басқарып барды. Онда И.В.Савицкий атындағы Қарақалпақстан Республикасы көркем өнер музейиниң этнография бөлиминиң аға хызметкери А.Пирназарова, ӨзР ИАҚҚБ Қарақалпақ гуманитар илимлер илим-изертлеӯ институты илимий хаткери М.Даӯлетияров ҳәм факультетимиздиң студент-жаслары қатнасты.
Илаждың мақсети – жаслар тәлим-тәрбиясында оқыӯ ҳәм билим алыӯ менен биргеликте мәдениятымызға деген ҳүрмет ҳәм сүйиспеншиликти арттырыӯ есапланады.
Музей хызметкери А.Пирназарова сөзге шығып, музейдиң дүнья жүзиндеги абрайының бәлент екенлигин ҳәм буның тийкарында бай ҳәм тәкирарланбас қол мийнети жатқанлығын айтып өтти.
Қарақалпақстан Республикасы И.В.Савицкий атындағы мәмлекетлик көркем-өнер музейи «Қарақалпақ нағыслаў өнери» атлы фотоальбомын баспадан шығарды. Альбомда музей коллекциясының декортив қол-өнериниң дүрдана нағыс үлгилери орын алған. Әсиресе, фотоальбом музейди келип көриў имкәниятына ийе емес көркем өнер ықласбентлери ушын халық дөретиўшилигиниң әжайып үлгилерин көриў имкәниятын бере алыўы менен бахалы. Сондай-ақ, музей экспонатлары менен өзбетинше танысыў ҳәм мағлыўмат алыў ушын аудиогидлер ҳәм фонограмма иске түсирилди. Аудиогидлер музейдиң бәрше бөлимлериндеги экспонатлары ҳаққында 5 тилде (өзбек, рус, инглиз, немец, француз тиллеринде) толық мағлыўмат береди.
Илаж студент-жаслардың сораў-жуўаплары менен даўам етти.
И.Елмуратов,
Факультеттиң жаслар менен бирге ислесиӯ бойынша декан орынбасары.
