Қарақалпақ филологиясы ҳәм журналистика факультети ушын жуўмақланып атырған 2019-жыл табыслар жылы болды. Факультеттиӊ 2020-жыл алдында өткерилген Илимий кеӊеси болып өтти.

Илимий кеңесте филология илимлериниӊ кандидаты, доцент Гулара Айназарованыӊ 60 жыллық юбелейи үлкен салтанат пенен өткерилди. Гулара Айназарова қарақалпақ тили билими илиминде орны үлкен илимпаз. Оныӊ «Қарақалпақ тилинде теӊлес еки компонентли фразеологизмлер» темасындағы илимий жумысы түркий тиллес халықлар арасында қарақалпақ тили бойынша биринши мәртебе изертленгени менен әҳмийетли. Илимпаз 30 жылдан аслам педагогикалық искерлиги дәўиринде «Ҳәзирги қарақалпақ тилиниӊ лексикологиясы», «Фразеология», «Теориялық тил билиминиӊ мәселелери» пәнлери бойынша студентлерге ҳәм магистрлерге тәлим бериў менен бирге магистрантлардыӊ жумысларына илимий басшылық етип киятыр.

Илимий кеӊести факультет деканы, доцент Қонақбай Турдыбаев ашты ҳәм басқарып барды. Юбелярдыӊ илимий – педагогикалық хызметлери  бойынша доцент Ш.Алланиязова баянат жасады. Сөзге шыққан профессор Қ.Жәримбетов, Қ.Оразымбетов, Ш.Абдиназимов, М.Жумамуратова, доцентлерден Қ.Пахратдинов, У.Даўлетова ҳәм басқалар  илимпаздыӊ қарақалпақ тили илимине қосқан үлеси ҳаққында толып тасып сөз етти. Университет ҳаял-қызлар шөлкеми баслығы доцент И.Сейтназарова илимпаз ҳаял-қызлар арасында Гулара Айназарованыӊ хызметлери үлкен екенлигине баҳа берди. Юбелярға университет ҳәм факультет жәмәәти атынан естелик саўғалар берилди.

З.Қожықбаева,

Журналистика кафедрасы доценти.