«Kitap-bilim bulaǵı», – deydi dana xalqımız. Ásirese, biz jas áwladtıń ruwxıy salamat, bárkamal bolıp jetilisiwimizde, oy – órisimizdi bayıtıwda kitap oqıwdıń áhmiyeti úlken.
Xalqımız tilinde kitap oqıp hám múnásip tárbiya alıw, kásip-óner úyreniwdiń áhmiyetine baylanıslı bolǵan xalıq danalıq sózleri júdá kóp. Atap ótsek, “Kitapsız aqıl-qanatsız qus”, “Bilim-aqıl shıraǵı”. Bulardı ele de uzaq dawam etiriwimiz múmkin. Ullı shayır hám aǵartıwshı Alisher Nawayı jazǵanınday “Kitap-biyminnet ustaz, bilim hám ruwxıy jetiklikke erisiwdiń eń tiykarǵı deregi”.
Házirgi kúnde mámleketimizde kitapqumarlıqtı arttırıwǵa úlken itibar qaratılmaqta. Bunıń ayqın mısalı retinde jaslar mánawiyatın jetilistiriw hám olardıń bos waqtın mazmunlı shólkemlestiriw boyınsha Prezidentimiz tárepinen alǵa súrgen 5 áhmiyetli baslamanı atap ótsek boladı. Bul baslamanıń biri “Jaslar mánawiyatın jetilistiriw, olar ortasında kitapqumarlıqtı keń en jaydırıw boyınsha sistemalı islerdi shólkemlestiriwge baǵdarlanǵan”. Usı múnásibet penen barlıq oqıw orınlarında túrli ushırasıwlar, sáwbetlesiw kesheleri ótkerilip kelinbekte.
Usınday ilajlardıń biri universitet 3-sanlı TTJ da “Kitap-bilim bulaǵı” atamasında ushırasıw keshesi bolıp ótti. Ushırasıwǵa Sanaat texnologiyasi fakulteti professor-oqıtıwshısı A.Joldasova basshılıq etti. Ushırasıwǵa Sanaat texnologiyasi fakulteti student-qızları qatnastı.
Ushırasıw barısında hár bir insan ómirinde kitaptıń tutqan ornı hám áhmiyeti haqqında pikir alısıwlar bolıp ótti. Qatnasıwshılar ózleri oqıǵan kitaplarınıń mazmunı haqqında aytıp berdi, ózleri súyip oqıytuǵın qosıqlarınan kórkemlep oqıp berdi hám qızıqtırǵan sorawlarına juwaplar aldı. Bunnan tısqarı ushırasıwda hár bir qatnasıwshı “Meniń shańaraǵım” temasında kishigirim shıǵarma jumısların jazdı.
Jaqsı kitap insanda Watanǵa muhabbat, milliy hám ulıwma insaniy qádiriyatlarǵa húrmet sezimlerin jetilistirip, jaqsılıqqa jeteleydi. Biz jaslardıń ómirimizde hám keleshegimizdi qurıwda kitaptıń tutqan ornı júdá úlken dep bilemen.
Ulzada Jiemuratova,
Sanaat texnologiyasi fakulteti 3-kurs studenti.
