I.Yusupov atındaǵı dóretiwshilik mektebinde Qaraqalpaq tiline mámleketlik til biyligi berilgenligine 31 jıl tolıw múnásibeti menen ótkerilgen ádebiy keshe mine usılay ataldı.

Qaraqalpaq filologiyası hám jurnalistika fakulteti 4-kurs ámeliyatshı studentleriniń hám I.Yusupov atındaǵı dóretiwshilik mektebi qaraqalpaq tili hám ádebiyatı páni muǵallimleriniń  baslaması menen 23-28-noyabr kúnleri aralıǵında Til bayramı hápteligi shólkemlestirildi. Háptelik dawamında mektep oqıwshıları arasında túrli tańlawlar bolıp ótti. Atap aytqanda, “Eń jaqsı diktant jumısı”, “Eń jaqsı shıǵarma”, “Jas dóretiwshi” tańlawlarında oqıwshılar ayrıqsha belsendilik penen qatnastı. Háptelikti shólkemlestiriwden tiykarǵı maqset – oqıwshılardıń sanasında ana tilimizge bolǵan húrmet sezimlerin oyatıp, olardıń ele de tereńirek bilimge iye bolıwın támiynlewden ibarat. Háptelik juwmaǵında oqıwshılar hám ámeliyatshı studentlerdiń qatnasında ádebiy keshe ótkerildi.

 Keshe dawamında qaraqalpaq til bilimi hám ádebiyattnıw ilimine baylanıslı kitaplar kórgizbesi shólkemlestirilip, studentler tárepinen oqıwshılarǵa qaraqalpaq til bilimin izertlewshiler haqqında keńirek maǵlıwmat berildi. Ana tilimizdi jırlaytuǵın qosıqlar kórkemlep oqıldı, tilimizdiń tazalıǵın keleshek áwladlarǵa jetkeriw baǵdarındaǵı tárbiyalıq kórinisler saxnalastırıldı.

Biz oylaymız, háptelik dawamında berilgen bilimler oqıwshılardıń yadında máńgige qaladı. Olar qaraqalpaq tiliniń ullılıǵın hám gózzallıǵın heshqashan umıtpaydı.

Qaraqalpaq filologiyası hám jurnalistika fakulteti studenti,

Biybixadisha Joldasbaeva.