"Óz tilińdi bilmey turıp, basqa tildi úyreniwge urınba" |

“Óz tilińdi bilmey turıp, basqa tildi úyreniwge urınba”

Qaraqalpaq tiline mámleketlik til biyligi berilgenliginiń 31 jıllıǵına baǵıshlanıp Qaraqalpaq mámleketlik universiteti akademiyalıq liceyde “Óz tilińdi bilmey turıp, basqa tildi úyreniwge urınba” atamasında ádebiy keshe bolıp ótti.

Ádebiy kesheni licey direktorı Gúlayım Allambergenova ashıp berdi. Ol óz sózinde bársheni bayram menen qutlıqlap, mámleketlik tildiń áhmiyeti, tildiń tazalıǵın saqlaw baǵdarındaǵı máselelerge toqtap ótti. Sońınan Qaraqalpaq filologiyası hám jurnalistika fakulteti 4-kurs studenti Almambetova Uldawlet tárepinen bayanat oqıldı. Ol óz bayanatında tildiń jámiyettegi áhmiyeti, óz ana tilinde taza sóylew haqqında aytıp ótti.

Ádebiy keshemizde Qaraqalpaq mámleketlik universtitetiniń bir qatar professor oqıtıwshıları bayanat jasadı, solardan Qaraqalpaq til bilimi kafedrası baslıǵı, filologiya ilimleriniń doktorı, professor Mámbetkárim Qudaybergenov óz sózinde qaraqalpaq tiline mámleketlik til biyligi berilgennen keyingi islengen jumıslar haqqında hám ele de kóp jumıslar isleniwi kerekligi haqqında, ana tilimizdiń tazalıǵın saqlaw hám jaslarımızdıń sóylew mádeniyatın arttırıw baǵdarındaǵı máselelerge toqtap ótti.

Sonday-aq, keshemiz miymanlarınan biri bolǵan shayır Gúlnara Nurlepesova so’zge shıǵıp milliy maqtanıshımız bolǵan ana tilimizdiń 31 jıllıǵı menen qutlıqlap, óz dóretiwshiliginen bayram keshesine arnap qosıq oqıp berdi. Jáne bir qutlıqlaw ushın sózge shayır hám jurnalist Patima Mırzabaeva da óz gezeginde bársheni bayram menen qutlıqlap, milletimiz aynası bolǵan ana tilimizdiń jámiyettegi ornı, ana tilimizde sap, taza sóylew hár birimizdiń baslı wazıypalarımızdıń biri ekenligin ayrıqsha atap ótti.