Ózbekstan Respublikası Prezidenti Sh.M.Mirziyoevtiń «Ulıwma orta bilim beriw mekteplerinde bilim sapasın hám oqıtıwshılardıń kásiplik sheberligin asırıw hám metodikalıq qollap-quwatlaw ushın biriktirilgen joqarı oqıw orınları haqqında»ǵı 07/1-2472-sanlı qararında kórsetilgen wazıypalardan kelip shıǵıp fakultetimizde biriktirilgen ustazlar tárepinen alıs rayonlardaǵı shetki mekteplerden xabar alındı.
Fakultetimiz ustazları birgelikte Shımbay rayonındaǵı 17-sanlı, Ámiwdárya rayonındaǵı 8- hám 23-sanlı, Beruniy rayonındaǵı 52- hám 55-sanlı ulıwma bilim beriw mekteplerinde boldı.
Bul mektepler oqıtıwshıları menen fizika fakulteti dekanı A.Muratov hám jaslar menen islesiw boyınsha dekan orınbasarı A.Yuldashev, fizika kafedrasınıń baslıǵı M.Tagaevlar tárepinen aldınnan islengen hám birgelikte islenetuǵın jumıslar haqqında sáwbetlesiwler ótkerildi.
Fizika páni boyınsha fizika kafedrasınıń assistenti B.Madaminov hám N.Aytımbetovlar tárepinen 11-klass oqıwshılarına master klass ótkerildi hám fizika páni boyınsha bilimlerin tekseriw maqsetinde hár hápteniń sońında testler alıp, olardıń joqarı oqıw orınlarına kiriw testleri ushın tayarlıq kóriw maqsetinde de hár túrli kitaplar hám testler berilip kelmekte.
Bul mekteplerdiń pitkeriwshi klass oqıwshıları menen ushırasıwlar ótkerilip, olardı Prezidentimizdiń xalıqqa jollaǵan múraajatnaması hám bilimlendiriw haqqındaǵı jańaliqlar menen tanıstırdı. Oqıwshılarǵa joqarı oqıw orınları hám olarǵa tapsırıw tuwralı keń túsinikler berildi.
Fakultet oqıtıwshıları mekteplerdiń materiallıq bazası, málimleme resurları orayları menen tanıstı. Mektep oqıwshılarınıń qanday kásipke qızıǵatuǵınlıǵın hám olardıń qaysı joqarı oqıw orınlarına tapsıratuǵın dizimi anıqlandı. Oqıwshılardıń ata-anaları menen ushrasıwlar ótkerilip, olarǵa húkimetimiz tárepinen jaratılıp berilip atırǵan sharayatlar boyınsha keń túsinikler berildi.
Bul mekteplerge Universitet rektoratı hám Fizika fakulteti tárepinen hár qıylı mazmundaǵı kitaplar hám oqıw quralları tapsırıldı.
Bunday shetki, járdemge mútáj mektepler menen turaqlı túrde baylanıslar alip barıw ol jerdegi oqıwshılardıń bilimge degen qızıǵıwshılıǵın hám kónlikpelerin asıradı. Bul Prezidentimiz tárepinen alip barılıp atırǵan rawajlanıwlar menen teńdey qádem taslaydı.
Fizika fakulteti 2-kurs studentleri
Omarova Raxima,
Eshniyazova Ulzada,
Muratbaeva Aysulıw.
