18-fevral kúni Berdaq atındaģı Qaraqalpaq mámleketlik akademiyalıq muzıkalı teatrında Ózbekstan hám Qaraqalpaqstan xalıq shayırı, Berdaq atındaģı mámleketlik sıylıqtıń laureatı, kórnekli shayır Tilewbergen Kupbatulla ulı Jumamuratovtıń tuwılģanına 106 jıl tolıw múnásibeti menen eske túsiriw keshesi bolıp ótti. Eske túsiriw keshesine respublikamızģa belgili shayır, jazıwshılar, professor-oqıtıwshılar, shayırdıń ul- qızları, aqlıq, shawlıqları, student jaslar hám ģalaba xabar quralları wákilleri qatnastı. Shayırdıń «Ana», «Diydarıń seniń», «Tolqında», «Sawlıq qádiri», «Júrek tilsimi», «Balıqshılar qosıģı», «Sulıwlıq», «Gúl» qosıqları, «Quwanısh penen uwayım» termesi  Qaraqalpaqstanģa belgili mádeniyat xızmetkerleri tárepinen janlı hawazda atqarıldı.

Shayırdıń «Jazıwshı hám altın balıq» shıǵarması tiykarında respublikalıq Jas tamashagóyler teatrı aktyorları tárepinen saxnaǵa qoyıldı. Keshege Respublikalıq Mehribanlıq úyi tárbiyalanıwshılarınıń  «Tań ģumshaları» toparı, qızı Zuxra Jumamuratovanıń shákirtleri tárepinen ayaq oyınları atqarıldı. Jáne de shayırdıń 106 jıllıģına baģıshlanıp Qırģızstanda ótkerilgen konferenciyadan úzindi hám Belarusiya, Tatarstan, Polsha, Qazaqstan, Ukraina ellerinen videoqutlıqlawlar tamashagóyler názerine usınıldı.

Qaraqalpaq filologiyası hám jurnalistika fakulteti studenti Bektursinova.S