Ximiya texnologiya fakultetiniń 2-s ximiya toparı studentleri topar basshısı Z.Uzakbergenova basshılıǵında studentlerdiń bos waqıtların mazmunlı όtkeriw hám elimizdiń tariyxın, mádeniyatın keńnen úyreniw maqsetinde  Qaraqalpaqstan Respublikası tariyxı hám mádeniyatı mámleketlik muzeyinde boldı.

 Bul muzey Oraylıq Aziyadaǵı eń áyyemgi muzeylerden biri bolıp esaplanadı. Onıń tariyxı 1929 -jılda Tόrtkil qalasında Qaraqalpaqstan úlke tanıw jámiyeti tárepinen islengen kórgizbeden baslanǵan. Házirgi kúnde muzey Nókis qalasında jaylasqan hám tábiyat, arxeologiya hám etnografıya bólimlerinen turadı.

Bizler muzeyde áyyemgi haywan hám ósimliklerdiń qaldıqları, Aral teńiziniń kem ushıraytuǵın hám joǵalıp baratırǵan qusları hám haywanları, kem ushraytuǵın  «Sońǵı Turan jolbarısı» eksponatı menen tanıstıq. Bul túrdegi jolbarıslar shıraylı terisi ushın qırıp taslanǵan hám aqırǵı Turan jolbarısı 1949 -jılda jergilikli xalıq tárepinen A’mudàrya deltasında óltirilgen.

Sonday-aq, muzeyde arxeologiyalıq ekspoziciyalar, Áyyemgi Xorezm qorǵanlarınıń maketleri, etnografiyalıq kórgizbeler: áyyemgi milliy lipaslar, zergerlik buyımları, qara úy hám onıń bezewleri, milliy muzikalıq ásbaplar menen tanısıp, áyyemgi ata-babalarımızdıń jasaw turmısı, haywanlardı ańlaw usılları, miynet quralları hám kiyiniw mádeniyatı haqqında júdá keń túsinikke iye boldıq.

                                                                                                                              Joldasbaeva Sarbinaz

                                                                                                                       2- s ximiya qániygeligi studenti.