Есенбай (Есберген Өтепбергенли) Қунназаров 1943 жылы Шымбай районында туўылған, 1960 жылы орта мектепти питирген, Әлишер Наўайы атындағы Самарқанд мәмлекетлик университетинде (1961-1966), Әзербайжан Республикасы ИА аспирантурасында (1971-1973), М. В. Ломоносов атындағы Москва мәмлекетлик университети қанигеликти асырыў курсларында (1979, 1986) оқыған, 1991 жылдың 27- декабринде Баку қаласында М. Ф. Ахундов атындағы Азербайжан педагогикалық рус тили ҳәм әдебияты институтының Д 054.07.01 Илимий Кеңесинде 10.02.19-Тил билимлери теориясы қәнигелиги бойынша дәслеп профессор Н.Г. Ағазаде, соңынан профессор Р.И. Могилевский илимий басшылығында жазған «Лексико-семантическая структура глаголов действия в немецком и каракалпакском языках» атлы темадағы кандидатлық диссертациясын жақлаған, филология илимлери кандидаты, доцент, «Лингвистическое понятие валентности и роль его освоения в процессе преподавания немецкого языка в каракалпакской аудитории», НГУ, Нукус, 1979, «Сопоставительный анализ сочетаемости переходных глаголов немецкого и каракалпакского языков», НГУ, Нукус, 1980, «Лексико-семантическая структура глаголов в разносистемных языках», «Билим», Нукус, 1993 атлы илимий китаплар, көплеген илимий мақалалар авторы, немис тилинен қаниге, 1966 жылдың 1-сентябринен баслап ҳәзир де бурынғы Т. Г. Шевченко атындағы Қарақалпақ мәмлекетлик педагогикалық институты, ҳәзирги Бердақ атындағы Қарақалпақ мәмлекетлик университети немис тили ҳәм әдебияты кафедрасында оқытыўшы, 1981-1986 жыллары университет факултетлер ара шет тиллер кафедрасын, 1995-1999 жылларда немис тили кафедрасын басқарған.
Есенбай (Есберген Өтепбергенли) Қунназаров Қарақалпақстан ҳәм Өзбекстан Республикалары Жазыўшылар Аўқамлары ағзасы болған, «Қумар» (1988, 1993), «Тәғдийрлер» (1993), «Лала» (2008). «Айша» (2009), «Лаура» (2010) атлы китаплардың, ең туңғыш шығармалары болмыш «Әдалатхан», «Гөҳийхап», «Ана жүреги» әпсаналарының, «Назлы», «Сөнген өмир» «Айгүл», «Елес-елес балалығым менен делбе-делбе жаслығым мениң» повестлери, «Жақынға хат», «Жойтылған хат», «Өмиримиздиң қысқа ҳәм узын қыссасы» ҳәм және бирқанша новеллалар, гүрриңлер авторы. Оның баспасөзде дунья әдебияты жулдызлары А. Чехов, С. Цвейг, Ч. Айтматов шығармалары қатарында баҳаланған әсиресе «Кумар» повести көп жыллардан бери илимий изертлеўлер объекти болып киятыр.
Танықлы жазыўшы, пидайы устаз Есенбай Қунназаровтың жарқын естелиги бизлердиң ядымызда мәңги сақланып қалады.
Д. Бердимуратов, ҚМУдың немис тили ҳәм әдебияты кафедрасы баслығы.
