Usı jıldıń may ayında belgili matematik alım, fizika-matematika ilimleriniń doktorı, professor Baxrom Abdazovich Omirov tárepinen Qaraqalpaq mámleketlik universiteti matematika fakulteti ziyrek studentleri hám magistrantlarına «Li algebralar teoriyası» páni boyınsha ilimiy-seminar alıp barıldı.
B.A.Omirov 1972-jıl 14-aprelde Qazaqstan Respublikasınıń Jambıl qalasında tuwılǵan. Ol 1989-1993 jılları Novosibirsk mámleketlik universitetiniń mexanika-matematika fakultetinde tálim aldi. 2000-jılı fizika-matematika ilimleriniń kandidati, 2006-jılı fizika-matematika ilimleriniń doktorı ilimiy dárejelerin hámde 2013-jılı professor ilimiy ataǵın alıwǵa miyasar boldı. Házirgi waqıtta Ózbekstan Milliy universiteti Algebra hám funkcionallıq analiz kafedrası baslıǵı lawazımında islep kelmekte.
B.A.Omirovtıń alıp barǵan ilimiy izertlewleriniń tiykarǵı nátiyjeleri ustazı akademik Sh.A.Ayupov hám kásiplesi I.S.Raximovlar avtorlıǵında 2019-jılda Taylor & Francis Group Publisher baspasında baspadan shıqqan “Leibniz algebras: Structure and Classification” atamasındaǵı monografiyasında óz sáwleleniwin taptı.
B.A.Omirov Fransiya, Italiya, Germaniya, Ispaniya, Turkiya, BAA, Qubla Koreya, Hindistan, Qitay, Malayziya, Pakistan, Meksika, Braziliya hám AQSh sıyaqlı mámleketlerde ilimiy saparlarda boldı. TWAS (Dúnya júzilik ilimler akademiyası)tıń 2008-jılda Meksikadaǵı, 2010-jılda Hindistandaǵı, 2011-jılda Italiyadaǵı ótkizilgen seminarlarında hámde 2014-jılı Qubla Koreyada bolıp ótken xalıq-aralıq Matematikler kongressinde qatnastı. 2019-2020-jıllarda Fullbrigth dásturi boyınsha AQSh nıń San-Diego universitetinde 10 ay dawamında saparda boldı.
Professor B.A.Omirov 2008-2013-jıllar dawamında TWAS jas ilimpazlar sekciyası aǵzası sıpatında saylanǵan bolsa, 2010-jılda TWAStıń jas ilimpazlar ushın beriletuǵın sıylıǵın qolǵa kirgizdi. 2017-jılda Web of Science maǵlıwmatlar bazasında eń kóp silteme etilgen maqalalar avtorı, 2018-jılda Scopus bazasındaǵı jurnallarda tábiyiy pánler boyınsha joqarı reytingke iye izleniwshi sıylıqları menen sıylıqlanǵan.
2017-jılda professor B.A.Omirov akademik Sh.A.Ayupov hám professorlar W.A.Roziqov, K.K.Kudaybergenovlar menen birgelikte Ózbekstan Respublikası tárepinen pán hám texnika tarawında Birinshi dárejeli Mámleketlik sıylıqtıń iyesi boldı.
B.A.Omirov – haqıyqıy zıyalı, miynetkesh, talapshań, joqarı mádeniyatlı, hárdayım haqıyqatshıl hám ádalatlı insan bolıp kelgen. Házirgi kúnde ol student jaslarǵa bilim beriw menen bir qatarda óziniń dawam etip kiyatirǵan ilimiy izertlewleri arqalı Ózbekstanda ilim-pándi rawajlandırıwǵa salmaqlı úlesin qosıp kelmekte.
Sarbinaz Aytmuratova
Qaraqalpaq mámleketlik universiteti
Matematika fakulteti 3-kurs studenti
