Búgin hátte túslerimde kórippen,

Ustazım dep arqa súyep júrippen,

Siz aytıpsız, durıs juwap berippen,

Bul tús deyip imtixanda qıynamań.

Matfak deyip ettim táwekelshilik,

Esabımda kóp bilemen kemshilik,

Qalǵanına qárekeńbiz, elshilik,

Qayta sorap shayır qızdı qıynamań.

Oqıp shıqtım Pifagordıń tariyxın,

Roman jazıp keltiremen táriypin,

Matematik bola alaman sózim shın,

Bir isenip shayır qızdı qıynamań.

Sessiya bul ilhamıma bir tosıq,

Esap qıyın, ketalmasam gáp qosıp,

Bir esapqa jazayın tap on qosıq,
Almasayıq. Shayır qızdı qıynamań.

Men jıǵılsam jábir bolar qaltaǵa,

6 aylıq stipendiya tur ortada,

Soń sabaqta qıynań meyli jortaǵa,

Biraq, házir imtixanda qıynamań.

Ózim jerde, juldızlarda qıyalım,

Bolǵım kelgen oqıp sizdey zıyalı,

Ózgerttirgim kelip atır dúnyanı,

Arzıwlarda júrgen qızdı qıynamań.

Kitap jazsam, bassa «Bilim» baspası,

Sizge bolsın tap birinshi nusqası,

Shákirtim dep maqtanarsız, qullası,

Bir mártege shayır qızdı qıynamań.

Ustazım-ay, imtixanda qıynamań…

Sarbinaz Aytmuratova

Qaraqalpaq mámleketlik universiteti Matematika fakulteti 3-kurs studenti