Pidayı miynettiń múnásip bahası

Kitap insandı jerden kókke kóteriwshi, onıń mánawiy kúsh-quwatın rawajlandırıwshı ullı kúsh. Kitaptıń ziya nurların jas áwlad qálbine mórlew – búgingi globallasıw jámiyetinde úlken wazıypa sanaladı.

Sonday kásip iyeleri bar, olar usı wazıypanı ózlerine ómirlik hám kásiplik uran etip alǵan. Olar – kitapxanashılar. Kitapxanashılar – kitap dep atalmısh úlken ǵáziyneniń asırawshıları, ondaǵı ilim nurların taratıwshılar hám dúnyanı ilim-bilim menen qutqarıwshılar esaplanadı. Mine usınday mashaqqatlı hám juwapkershilikli wazıypanı óz moynına alǵan hám onı artıǵı menen orınlap kiyatırǵan, usı kásip sebep úlken mámleketlik itibarǵa ılayıq dep tabılǵan kitapxanashılardıń biri – Berdaq atındaǵı Qaraqalpaq mámleketlik universiteti Málimleme-resurs orayı, Málimleme-kitapxana resursları menen xizmet kórsetiw bólimi bas kitapxanashısı, universitetimizdegi “Kitapqumarlar” klubınıń tiykarshısı hám baslıǵı, universitet Hayal-qızlar keńesi aǵzası Kalmurzaeva Rawshan Allamuratovna.

Rawshan Allamuratovna 1990-1997-jllarda Berdaq atındaǵı Qaraqalpaq mámleketlik universiteti fundamental kitapxanası liftiyorı, 1997-2002-jıllarda universitet fundamental kitapxanası kitapxanashısı, 2007-jıl QMU MRO jetekshi kitapxanashısı, 2007-2017-jıllar universitet MRO fondın saqlaw bólimi jetekshi kitapxanashısı, 2017-2018-jıllarda MRO Málimleme-kitapxana resursları menen xizmet kórsetiw bólimi I dárejeli bibliografı, 2019-jıldan tap házirgi waqıtqa shekem MRO Málimleme-kitapxana resursları menen xizmet kórsetiw bólimi bas kitapxanashısı lawazımlarında óz miynet iskerligin dawam etip kelmekte. “Kitapxanamızdıń hárbir múyeshin, hárbir kitaptıń jaylasqan ornın, hátte, shifr nomerlerine shekem yadtan bilemen”, – deydi R.Kalmurzaeva. Álbette, uzaq jıllıq miyneti sińgen orın mudam kewilge jaqın boladı. Ustazımızdıń jáne bir maqseti bar edi, ol da bolsa universitetimiz jasların biriktirip, kiatpqumarlıq mádebiyatın arttırıw, jaslardı kitapqa qızıqtırıw maqsetinde kitapxana janında kitapqumarlıq klubın shólkemlestirse. Shın kewilden shıqqan maqset, qızǵın háreket hám miynet nátiyjesinde ámelge asıwı gúmansız. R.Kalmurzaevanıń bul maqseti de orınlanıp, 2017-jılı universitet kitapxanası janında “Kitapqumarlar” klubı shólkemlestirildi. Bul klub Qaraqalpaqstan Respublikasında birinshilerden bolıp ashılǵan edi. Klub óz qushaǵına kóplegen kitapqumar jaslardı biriktirdi. Ustazımız baslaǵan baslama búgingi kúnde en jayıp, respublikamızdıń basqa aymaqlarında hám mákemelerde usınday klublar payda boldı. Oǵan birikken jaslardıń maqseti bir – Ana Watanǵa óz bilimi hám nátiyjeleri menen úlken maqtanısh alıp keliw, ózi qatarlı kitapqumar jaslardıń qatarın kóbeytiw hám olar menen birge “Úshinshi Renessans” qa qaray nıq qádemler taslaw.

Óz kásibin shın kewilden súygen insan jámiyette óz ornın tawıp, úlken itibar hám alǵısqa miyassar boları sózsiz. Prezidentimizdiń tikkeley baslaması tiykarında Ózbekstan Respublikası Ministrler Kabinetiniń 2020-jıl 22-dekabrde “Málimleme-kitapxana aǵlası” kókirek nıshanın engiziw haqqında” ǵı qararı qabıl etilgen edi. Qararǵa muwapıq, bul kókirek nıshanı menen málimleme-kitapxana tarawın rawajlandırıwǵa, xalıqqa málimleme-kitapxana xizmetin kórsetiwdiń jańasha sistemasın jaratıwǵa, kitapxanalarda saqlanıp atırǵan milliy mádeniy miyraslardı asırap abaylaw hám bayıtıw jumıslarına múnásip úles qosqan, jámiyette kitapqumarlıq mádeniyatın, kitap oqıwdı keń úgit-násiyatlaw hám jas qánige kadrlardı tayarlaw baǵdarlarında nátiyjeli miynet qılǵan hám usı tarawlarda joqarı nátiyjelerge erisken qánigeler sıylıqlanadı. Usı jılı respublikamızda birinshi mártebe 21-may Xalıqaralıq kitapxanashılar kúni keń kólemde belgilenip, “Máoimleme-kitapxana aǵlası” kókirek nıshanı menen birqatar kásip pidayıları saltanatlı túrde sıylıqlandı. Solardıń qatarında Ráwshan Kalmurzaeva da bar.

Álbette, pidayı miynet óz bahasın tabadı. Biz, QMU “Kitapqumarlar” klubı jámááti anamızday qádirdan ustazımız, jol baslawshımız Rawshan Kalmurzaevanı úlken tabısı menen qutlıqlaymız. Jas áwladtı kámil insanlar sıpatında tárbiyalawday mashaqqatlı hám juwapkershilikli islerińizde talmas kúsh-ǵayrat tileymiz.