2020-2021-oqıw jılınıń aqırında studentlerdi «Qaraqalpaq folklorı» páninen ámeliyatqa jiberiw boyınsha fakultetimizde jıynalıs ótkerildi. Jıynalıstı fakultetimiz dekanı Qonaqbay Turdıbaev ashıp berdi hám alıp bardı.
Jıynalısta birqansha oqıtıwshılar hám studentler qatnastı.
Ustazlarımızdan: Qonaqbay Turdıbaev, Qonısbay Yusupov, Perdebay Nurjanov, Inabat Allambergenova, Jeńisbay Nızamatdinovlar ámeliyat haqqında keńnen túsinik berdi hám de hár oqıtıwshıǵa studentler bólistirildi.
Jıynalısta ámeliyat waqtında isleniwi kerek bolǵan wazıypalar, onıń maqseti tuwralı túsinik berildi. Jıynalıstan soń bizlerge Perdebay Nurjanov basshı etip bekitildi. Bizlerde altı studentten ibarat gruppa dúzilip, Perdebay Nurjanov birgelikte kishi jıynalıs ótkerdi hám ámeliyattıń tártip-qaǵıydaları (jas úlkenler menen qalay sálemlesiw kerek, olar menen sáwbetleskende nelerge itibar beriw kerekligi haqqında), aldımızdaǵı wazıypalar haqqında keńnen túsinik berdi.
Soń bizler 1-iyun sánesinen baslap dala ámeliyatına shıqtıq.
Ámeliyat dáwirinde hár qıylı ańızlar, ápsanalar, naqıl-maqal, bet ashar, aytıs, aytımlar h.t.b. janrlardaǵı qızıqlı maǵlıwmatlarǵa iye boldıq. Usılardıń ishinde meni qızıqtırǵanı Ótesh batır haqqındaǵı ańgimeler boldı. Sol batırdıń inisiniń balası bolǵan 70 jaslı Sársenbay aǵanıń úyine barıp Óteshtiń jaslıq waqtı, onıń awılı, batırlıqları haqqında bilip aldım.
( Súwrette: Óteshtiń inisi Pirlepestiń ulı Sársenbay)
Jası úlkenler menen hár bir sáwbetlesiw júda paydalı hám qızıqlı bolıp ótti. Ámeliyat arqalı bizler tek ǵana folklorlıq materialǵa iye bolmasatan jası úlken aǵa-apalarımızdan xabar alıp, olardıń kewillerin kóteriwge sebepshi boldıq.
Usı ámeliyat barısında xalqımızdıń hár qıylı awızeki dóretpeleri, olardıń turmısımızda tutqan ornı girewli ekeni, awızeki dóretpeler hesh waqıtta joyılıp ketpeytuǵının túsindik. Toplaǵan materillarımız arqalı ertedegi ata-babalarımızdıń kún kórisi, úrp-ádetleri, olardıń neler menen shuǵıllanǵanı haqqında kóp ǵana maǵlıwmatqa iye boldıq, bilip aldıq.
Qaraqalpaq filologiyası hám jurnalistika
fakulteti 1-«E» topar studenti
Óteshov Berdaq
