Қарақалпақ мәмлекетлик университетинде Экономика факультетиниң «Улыўма экономикалық пәнлер» кафедрасы тәрепинен «Инновациялық исбилерменлик: машқалалар ҳәм шешимлер» атамасында теориялық-әмелий конференция шөлкемлестирилди.
Конференцияны университет ректоры, профессор Реймов Ахмет Мәмбеткаримович ашып берди.
Конференцияны шөлкемлестириўден тийкарғы мақсет -Президентимиздиң 2021-жыл 20-август сәнесиндеги исбилерменлер менен ушырасыўында белгилеп берилген ўазыйпаларды әмелге асырыўда жоқары оқыў орынларының искерлигин жеделлестириўден ибарат екенлигин көрсетти. Конференцияға Өзбекстан Республикасы Олий Мажлиси Нызамшылық палатасы депутаты М.Ибрагимов ҳәм Л.Сейтова, Өзбекстан Республикасы Президенти жанындағы Арал бойы халық аралық инновация орайының халықаралық ҳәм корпоратив байланыслар бөлими баслығы Х.Қайыпназаров, Қарақалпақстан Республикасы монополияға қарсы гүресиў комитети баслығы орынбасары Б.Исмайлов, Қарақалпақстан Республикасы экономикасына өз хызметлери менен үлкен үлес қосып киятырған исбилерменлер, «Строй-Вектор» қурылыс кәрханасы баслығы Қ.Панаев, «Муратбек-мебель» ЖШЖ баслығы М.Таңирбергенов, «Қарақалпақ Авто Сервис» ЖШЖ баслығы Ж.Есмурзаев, «Электроника» ЖШЖ баслығы Б.Ақполатов, сондай-ақ ZOOM бағдарламасы арқалы Ташкент мәмлекетлик экономика университети, Әндижан мәмлекетлик университети, Бухара мәмлекетлик университети, Ургенч мәмлекетлик университети, Самарқанд сервис ҳәм экономика институты, Қазақстан Миллий Аграр университети профессор-оқытыўшылары қатнасты.
Конференцияда университет ректоры А.Реймов шығып сөйлеп, мәмлекетимиз Президенти Ш.Мирзиёевтың усы жылдың 20-август сәнесинде Исбилерменлер менен болып өткен ушырасыўында илим- пәнди раўажландырыў арқалы санаат тараўларына ең заманагөй технологияларды кең енгизиў бағдарламалары ислеп шығылыўы ҳәм әмелге асырылыў ўазыйпасының белгилеп берилгенлиги ҳәм бул ўазыйпаны әмелге асырыўда жоқары оқыў орынларының алдына үлкен ўазыйпалар жүклетилгенлигин атап өтти.
Олий Мажлис нызамшылық палатасы депутаты М.Ибрагимов ҳәм Л.Сейтовалар шығып сөйлеп, экономиканы раўажландырмай турып басқа салаларды раўажландырыў мүмкин емеслигин ҳәм экономиканы раўажландырыўда биз тек исбилерменлерге сүйенетуғынлығымызды айта отырып, биз тәрбиялап атырған студент жаслар арасынан да өзиниң бизнес идеясына ийе болған жасларды қоллап-қуўатлаўымыз зәрүрлигин атап өтти.
Өзбекстан Республикасына белгили исбилерменлерден бири Қ.Панаев шығып сөйлеп, исбилерменликти жүргизиўдеги өз тәжрийбелери менен ортақласты ҳәм өз бизнес идеяларына ийе болған студент жасларды исбилерменликке үйретиў, оларды оқытыў ҳәм мастер класслар шөлкемлестириўге өзиниң жәрдем беретуғынлығын атап өтти.
«Муратбек мебель» ЖШЖ баслығы М.Таңирбергенов шығып сөйлеп, исбилерменликти дәслеп усташылық өнерин ийелеўден баслағанлығын айта отырып, студент-жасларды оқыў менен бирге өнер ийелеўге де шақырды.
«Қарақалпақ Авто Сервис» ЖШЖ баслығы Ж.Есмурзаев шығып сөйлеп, исбилерменлик хызметинде салық жеңилликлери ҳәм олардан пайдаланыў бойынша өз мәсләҳәтлерин берди.
Экономика факультети деканы орынбасары Қ.Нурманов
