Házirgi kúnde usi súren astında elimiz boylap kóplegen is-ilajlar ótkerilip atırǵanı belgili. Bul ilajlardıń barlıǵı da watanımızda jasap atırǵan kóplegen millet wákilleriniń awızbirshiliginiń bir bólegin ǵana kórsetedi. Burınnan «awılı aralas, qoyı qoralas» bolıp jasap kiyatırǵan xalıqlar óz milliyligin, úrip-ádetin saqlap, onıń keleshek áwladqa sap halında jetkeriwdi óz maqseti dep biledi. Bunıń ushın álbette, jas awladtıń sanasına bul ullı maqsetti sińdiriw ushın birinshi shańaraqtan baslansa, ekinshi mektep dárgáyınan baslanadı.
Mine usi is-ilajlardıń bir kórinisi sıpatında Ózbek filologiyası fakulteti qazaq tili hám ádebiyatı tálim baǵdarı 4-kurs studentleri tárepinen Nókis qalası Xalıq bilimlendiriw bólimine qaraslı 22-sanlı qánigelestirilgen mektebinde «Ózbekstan – ortaq úyimiz» atamasında keshe bolip ótti. Keshede mekteptiń mánawiyat isleri boyınsha úgit-násiyatshısı sózge shıǵıp, elimizdegi xalıqlar doslıǵına ayrıqsha toqtap ótip, kesheni ashıp berdi. Soń usı mekteptiń joqarǵı kategoriyalı qazaq tili hám ádebiyatı páni muǵallimı Bajimova Urxıya sózge shıǵıp ótkerilip atırǵan kesheniń mánis-mazmunı haqqında aytıp ótti.
Keshege miyman sıpatında qazaq tili ham ádebiyati kafedrası oqıtıwshısı filologiya ilimleri boyınsha filosofiya doktorı Sh.Smamutova hám Qazaq milliy-mádeniy orayınıń bilimlendiriw isleri boyınsha orınbasarı R.Kenjebaeva hám magistrantlar qatnastı. Keshe sońında mektep direktorı Sh.Embergenova sózge shıǵıp, keshe qatnasıwshılarına, shólkemlestiriwshi ámeliyatshılar hám ustazlarǵa óz minnetdarshılıǵın bildirdi.
Keshege belsene qatnasqan oqıwshılar sıylıqlandı.
QMU Baspasóz xızmeti
