Búgin, 3-dekabr kúni Berdaq atındaǵı Qaraqalpaq mámleketlik universitetinde Ózbekstan Respublikası Konstituciyasınıń qabıl etilgenine 29 jıl tolıwına arnalǵan saltanatlı ushırasıw bolıp ótti

 Ózbekstan Respublikası Konstituciyası qabıl etilgen kúni bayramı aldınan bilimlendiriw mákemelerinde “Ózbekstan Respublikası Konstituciyasınıń jigirma toǵız jıllıǵı” atamasında ushırasıw dawam etpekte.

Ózbekstan hám Qaraqalpaqstan Respublikalarınıń mámleketlik gimnleri menen baslanǵan saltanatlı ushırasıwdı universitet rektorı, professor Axmed Reymov kiris sózi menen ashıp berdi.

Ilajda atap ótilgenindey, tiykarǵı nızamımız óziniń tereń oylanǵan principleri hám qaǵıydaları menen ajıralıp, elimizdiń táǵdirin, hár bir insannıń huqıq jáne erkinliklerin belgilewde áhmiyetli hújjet bolıp esaplanadı.

1992-jılı 8-dekabr kúni ǵárezsiz Ózbekstannıń Konstituciyası qabıl etildi. Konstituciyanı islep shıǵıwda nızamshılıqtaǵı aldınǵı sırt el tájiriybeleri menen birgelikte xalqımızdıń kóp ásirlik mentaliteti, jasaw sharayatı, ata-babalardan miyras bolıp kiyatırǵan úrp-ádetleri de basshılıqqa alındı.

Konstituciyada tiykarǵı itibar insan hám onıń huqıqları jáne erkinlikleri, yaǵnıy, Ózbekstan Respublikasınıń hár bir puqarasına jeke, siyasiy hám sociallıq-ekonomikalıq huqıq jáne erkinliklerdiń kepillikleri támiyinlendi.

Elimizde nızam ústinligin támiyinlew arqalı puqaralıq jámiyetin qurıw, bunıń ushın xalqımızdıń huqıqıy mádeniyatın arttırıw, búgingi ómirden razı bolıp jasawı ushın olarǵa múnásip turmıs sharayatların jaratıp beriw baǵdarında sońǵı jıllardaǵı alıp barılıp atırǵan jumıslar ayrıqsha atap ótildi.

Ushırasıwda búgingi kún ushın áhmiyetli  máselerdiń biri- Korrupciya illetiniń aldın alıw barısında keń sóz etildi.

Korrupciya –jámiyettiń rawajlanıwına keri tásir etip qoymastan, elimizdegi háreket etip turǵan nızamlarǵa biypárwalıq hám olarǵa húrmetsizlik túsinigin sáwlelendiredi.

Joqarı oqıw orınlarındaǵı komplayens qadaǵalaw sistemasın basqarıw bólimleriniń xızmeti joqarı ekenligi haqqında sóz etildi. Korrupciya aralasqan jerde insan huqıqları sheklenip, hár qanday tarawda rawajlanıw bolmaytuǵınlıǵı, sonday-aq, korrupciyanıń aldın alıw barısında isleniwi kerek wazıypalar atap ótildi.

Tiykarǵı nızamımızda keleshek áwladlardıń bilim alıwı, jetik insan bolıp jetilisiwi ushın zárúr bolǵan principler hám qaǵıydalar belgilep berilgen. Sońǵı jılları joqarı bilimlendiriw sistemasına qaratılıp atırǵan itibar hám ǵamqorlıqlar usı maqsetlerge erisiw ushın xızmet etedi. 

Usınday imkaniyatlar nátiyjesinde elimiz jasları ilim, bilimlendiriw, mádeniyat, sport hám turmıstıń basqa da salalarında úlken tabıslardı qolǵa kirgizip kelmekte.

Sońǵı qısqa dáwir ishinde Berdaq atındaǵı Qaraqalpaq mámleketlik universiteti student-jasları hár qıylı xalıqaralıq tańlawlarda, sport jarıslarında belsene qatnasıp, joqarı nátiyjelerge erisip kiyatırǵanı jaslarǵa jaratılǵan imkaniyatlardıń nátiyjesi bolıp esaplanadı.

Ushırasıwǵa Qaraqalpaqstan Respublikası Joqarǵı Keńesiniń komitet baslıǵı Z.Reymova, Qaraqalpaqstan Respublikası IIM orınbasarı I.Axmedov, Qaraqalpaqstan Respublikası sudı sudyası A.Abdikarimov qatnastı.

Ilajda universitettiń yuridika fakulteti docenti X.Kabulov, yuridika fakulteti studenti D.Lepesbaev óz bayanatları menen qatnastı.

Bayram ilajı universitet boylap dawam etpekte.

QMU Baspasóz xızmeti