Batıs Qazaqstan innovaciyalıq-texnologiyalar universitetiniń docenti Kalmenov Murat Dabılovichtıń «Zamanagóy arxeologiyalıq izertlew usılları» – atamasında Zoom baǵdarlaması arqalı usı jıl 9-dekar kúni seminar bolıp ótti.

Seminarǵa Tariyx fakulteti dekanı, docent, S.Sulaymanov, Arxeologiya kafedrası baslıǵı, docent, J.Xakimniyazov, úlken oqıtıwshı A.Alimbetov, assistent oqıtıwshı M.Tolıbaev, A.Azatov  hám de bakalavr arxeologiya tálim baǵdarınıń 2-3-kurs student jasları qatnastı. 

Seminardı Tariyx fakulteti dekanı docent S.Sulaymanov hám Arxeologiya kafedrası baslıǵı docent J.Xakimniyazovlar kiris sóz benen ashıp berdi.

Bunnan soń Batıs Qazaqstan innovaciyalıq-texnologiyalar universitetiniń docenti M.D.Kalmenov bayanat jasap, ol Qazaqstanda arxeologiya iliminiń házirgi kúndegi rawajlanıw jaǵdayı, izertlewler nátiyjesinde qolǵa kirgizilip atırǵan jańalıqlar, dala-arxeologiyalıq izertlewlerde qollanılatuǵın jańa metodikalar, arxeologiya tarawına engizilip atırǵan zamanagóy innovaciyalıq texnologiyalar boyınsha óz-ara ortaqlastı.

Jáne de, házirgi kúnde Qazaqstan Respublikasında arxeologiyalıq dala izertlew jumısları alıp barılıp atırǵan bir neshe tariyxıy-arxeologiyalıq estelikler hám olardaǵı materiallıq tabılmalar, olardıń klassifikaciyası, ózine tán bolǵan ózgeshelikleri, basqa da qońsılas úlkeler menen bolǵan mádeniy baylanısların tastıyıqlawshı uqsaslıq belgileriniń analizi boyınsha jańa materiallardan maǵlıwmatlar keltirilip ótildi. 

Seminar barısı soraw-juwaplarǵa tolı bolıp, student jaslar ózlerin qızıqtırǵan sorawlarına tiyisli juwapların aldı. Sonday-aq, seminar jańalıqlarǵa bay bolıp, student jaslar ózlerine kerekli bolǵan bilim hám tájiriybelerge iye boldı.     

Seminar juwmaǵında fakultet dekanı, docent S.Sulaymanov seminar jańalıqlarǵa hám maǵlıwmatlarǵa tolı bolǵanlıǵın hám keleshekte arxeologiyalıq izertlewlerdi birgelikte alıp barıp, arxeologiya iliminde óz-ara tájiriybeler almasıw kerekligin atap ótti hám birge islesiw boyınsha pikir-usınısların bildirip ótti.

Búgingi seminar ushın fakultet jámááti atınan docent Murat Dabılovich Kalmenovqa minnetdarshılıq bildirdi hám aldaǵı jumıslarına tasqın tabıslar tiledi.    

    T.Sársenbaev

Tariyx fakulteti 3-basqısh studenti.