Joqarı oqıw orınları kredit –modul sistemasına ótkenligi sebepli universitetimizde barlıq fakultetlerde kafedra baslıqları hám professor –oqıtıwshıları ushın «Kredit-modul sisteması tiykarında bilimlendiriw processlerin shólkemlestiriw» baǵdarında seminar sabaqları dawam etpekte.     

Usı jıldıń 10-yanvar kúni Qaraqalpaq filologiyası hám jurnalistika fakultetinde «Kredit-modul sisteması tiykarında oqıw processlerin shólkemlestiriw» hám Hemis platpormasınan paydalanıwdıń abzallıqları haqqında seminar sabaqları bolıp ótti. 

Seminar dawamında kredit-modul sistemasınıń tiykarǵı túsinikleri, shet el kredit sistemalarına analiz, studentlerdiń όz betinshe jumısların hám Málimleme resurs orayları xızmetlerin shόlkemlestiriw, kredit-modul sistemasında oqıw processlerin shόlkemlestiriw hám HEMIS programmasında islew máseleleri boyınsha túsinik berildi.

Seminarda jáne bir áhmiyetli máselege itibar berildi.

Sonǵı kúnlerde Qazaqstanda bolıp atırǵan kewilsiz waqıyalardan paydalanıp, ayırım adamlar arasında túsinbewshilik jagdayları ushırasıp qalmaqta.  Ashınarlısı olar bul jolda sociallıq tarmaqlar arqalı psixologiyaǵa tásir etiwshi provokaciyalıq videolar tarqatıp, hár túrli hiylelerden paydalanbaqta.

Usınday islerden jaslarımızdı awlaq etiw bas maqsetimiz bolıp, hár bir professor- oqıtıwshı jaslar tárbiyasında sergek bolıwı búginniń talabı ekenligi eskertildi.