Prezidentimizdiń 2020-jıl 7-maydaǵı “Matematika tarawındaǵı tálim sapasın asırıw hám ilimiy izlenislerdi rawajlandırıw haqqında”ǵı PQ-4708 sanlı qararına muwapıq student jaslardıń bos waqıtların mazmunlı ótkeriw maqsetinde usı jıldıń 18-yanvar kúni Berdaq atındaǵı Qaraqalpaq mámleketlik universiteti (QMU) matematika fakulteti matematikalıq analiz kafedrası 4-kurs pitkeriwshi studentleri baslaması menen QMU pitkeriwshileri bolǵan, al házirgi kúnde Rossiya Federaciyası Novosibirsk milliy ilim izertlew mámleketlik universiteti hám Rossiya ilimler akademiyası Sibir bólimi Sobolev atındaǵı Matematika institutı “Aspirantura” basqıshında tálim alıp atırǵan jas matematikler hám QMU studentleri arasında onlayn sáwbet shólkemlestirildi. Sáwbet dawamında studentler ózlerin qızıqtırǵan sorawlarǵa juwap alıw menen bir qatarda, Ózbekstan tálim sisteması menen Rossiya tálim sistemasın salıstırıw arqalı óz-ara pikirler almastı. Sonday-aq, házirgi kúnde dúnyanıń eń kúshli 1000 universitetleri diziminde 246-orında turıwshı Novosibirsk mámleketlik universiteti aspirantları Hákimbaev Aziz, Qutbaev Aydos hám Sobolev atındaǵı Matematika institutı aspirantı Jetpisbaev Mamanbiyler tárepinen studentler ushın “Master klass”lar alıp barıldı.
Bul aspirantlar Qaraqalpaq mámleketlik universitetinde oqıp júrgen waqıtlarınan baslap-aq eń úlgili hám bilimli studentlerdiń biri edi. Ustazları professor K. Kudaybergenov, doc. B. Kurbanov hám basqa da proffesor oqıtıwshılardıń bergen bilimleri nátiyjesinde 2019-jılı Jetpisbaev Mamanbiy, Hákimbaev Aziz hám Qutbaev Aydos Qaraqalpaq mámleketlik universiteti “Matematika” fakultetin tabıslı tamamlap Rossiya federaciyası Novosibirsk mámleketlik universiteti Mexanika-matematika fakulteti magistratura basqıshına grant tiykarında oqıwǵa túsedi. Magistratura basqıshında oqıp júrip ózlerin jaqsı tárepleme kórsete alǵan jas matematiklerimiz Rossiyanıń ataqlı alımlarınıń ilimiy basshılıǵında ilimiy-izertlew jumısların alıp bardı. 2021-jılı magistratura basqıshın tabıslı tamamlap, usı jıldıń ózinde Jetpisbaev Mamanbiy Rossiya federaciyasında jaylasqan Sobolev atındaǵı Matematika institutı, al, Hákimbaev Aziz hám Qutbaev Aydoslar Novosibirsk mámleketlik universitetiniń aspirantura basqıshına grant tiykarında oqıwǵa qabıllanadı. Bunda aspiranturaǵa Ózbekstan Respublikasınan barǵan birqansha jas matematikler arasınan 3 adam oqıwǵa qabıllanıp, bárshesi Qaraqalpaq mámleketlik universiteti pitkeriwshileri ekenligi bizdi quwandıradı. Házirgi kúnde olar aspiranturada oqıwın dawam ettirip atır.
Sáwbet dawamında jas matematiklerimizden bunday joqarı nátiyjelerge erisip kiyatırǵanlıǵı sebebi soralǵanda, tınımsız izlenisleri qatarında, Qaraqalpaq mámleketlik universitetindegi tálim alıw ushın jaratılǵan imkaniyatlardı ayrıqsha atap ótti.
Haqıyqatında da, búgingi kúnde Qaraqalpaq mámleketlik universitetinde student jaslardıń jeterlishe bilim alıwı hám dúnya tán alǵan universitetlerdiń oqıwshıları menen hár tárepleme bellese alıwı ushın barlıq sháráyatlar jaratılǵan. Joqarı mamanlıqtaǵı professor oqıtıwshılar, ilim doktorları sanı jıldan jılǵa kóbeyip atırǵanlıǵı, sonday-aq Ózbekstannıń jetekshi joqarı oqıw orınları menen ilim-izertlew institutları hámde shet el mámleketlerine magistratura, aspirantura basqıshlarına oqıwǵa qabıllanıp atırǵan studentlerdiń qatarı QMU pitkeriwshileri menen tolısıp atırǵanlıǵı pikirimizdiń ayqın dáliyli desek boladı.
Aytmuratova Sarbinaz
Qaraqalpaq mámleketlik universiteti Matematika fakulteti 4-kurs studenti, matematikalıq analiz kafedrası pitkeriwshisi.
