Tiykarınan suwda jasawshı quslardıń jasaw ornı bolǵan orınlar sıpatında xalqaralıq áhmiyetke iye bolǵan suwlı-batpaqlıq maydanlar haqqındaǵı Ramsar konvensiyasınıń qabıl etilgenligine 51 jıl toldı. Bul ekologiyalıq sáne hár jılı Biologiya fakultetinde kóterińki ruxta ótkerilip kelinbekte. Usı jıldıń 2-fevral kúni de bul sáne ayrıqsha belgilendi. Ótken jıllardaǵıdan parqlı túrde ilaj Qaraqalpaqstan Respublikası tariyxı hám mádeniyatı mámleketlik muzeyinde  «Ramsar konvensiyasınıń qorshaǵan ortalıqtı qorǵawdaǵı áhmiyeti» dep atalǵan atamada shólkemlestirildi.

Ilajda Qaraqalpaqstan Respublikası tariyxı hám mádeniyatı mámleketlik muzeyi direktorı A.Yusupova, Ózbekstan Ekologiyalıq partiyası Qaraqalpaqstan Respublikası partiya shólkemi Keńesi baslıǵı A.Begimova, Biologiya fakulteti dekanı Ya.Ametov, “Ekologiya hám topıraqtanıw” kafedrası professor-oqıtıwshıları hám magistrantları, sonday-aq Nókis qalasındaǵı 4- hám 13-sanlı mektep oqıwshıları qatnastı. Ilaj dawamında Ramsar konvensiyasınıń mazmunı, Ózbekstandaǵı suwlı-batpaqlı aymaqlar, ol jerde ushırastuǵın quslar haqqında tolıq maǵlıwmat berildi.

Oqıwshılar menen soraw-juwap formasında tańlaw shólkemlestirilip, belsendi qatnasqan mektep oqıwshılarına sawǵalar berildi. Soń muzey qánigeleri tárepinen keyingi waqıtlarda ótkeriletuǵın ilajlardı birgelikte ótkeriw usınısın bildirdi.

A.Nag`ashibayeva   “Ekologiya hám topıraqtanıw”kafedrasi assistenti