2022-jıl fevral ayınıń 14-sánesi kuni Qaraózek rayonınıń hákimligi menen birgelikte Berdaq atındaǵı Qaraqalpaq mámleketlik universitetiniń 2021-2022 oqıw jılında pitkeriwshi Qaraózek rayonı turǵınları qatnasıwında “Bilimlendiriw hám karera” atamasında sáwbetlesiw hám ushırasıw keshesi ótkerildi.
Qaraózek rayonı hákiminiń jaslar siyasatı, sociallıq rawajlandırıw hám ruwxıy aǵartıwshılıq máseleleri boyınsha orınbasarı I.Qosıbaev «2022-2026-jıllarǵa mólsherlengen jańa Ózbekstannıń rawajlanıw strategiyası»nda belgilengen ilajlar boyınsha jas kadrlardı qollap -quwatlaw hám bilimlendiriw tarawında kóbirek itibar qaratılıp atırǵanı haqqında shıǵıp sóyledi.
Berdaq atındaǵı Qaraqalpaq mámleketlik universiteti Tariyx fakulteti dekanı S.Sulaymanov 2021-2022 oqıw jılı universitte student hám jumıs beriwshilerdi bir-birine baylanıstırıwshı “Karera orayı” nıń shólkemlestrilgenligin hámde oraydıń tiykarǵı wazıypaları haqqında túsindirip ótti. Sonday-aq tálim sistemasında kadrlar ushın jaratılıp atırǵan imkaniyatlar, ministrlik iskerligi, birden-bir mámleketlik huqıqıy siyasattı ámelge asırıw hámde ashıqtan-ashıq ámelge asırılıp atırǵan úlken isler haqqında aytıp ótildi. Xalıq tálimine – joqarı maǵlıwmatlı hám ámeliy tájiriybege iye qánigelerdi izlew, tańlaw hámde jumısqa shaqırıw tártibi kirgizilip, usı tartip áhmiytli ekenligin aytıp ótti. Bugingi kúnde prezidentimiz tárepinen shıǵarıp atırǵan pármanları tiykarında, yaǵnıy uzaq rayonlarda bilimlendiriw tarawında xızmet etiwshi kadrlarǵa qosımsha ústemeler ajıratılıp atırǵanlıǵı haqqında toqtap ótti.
Universitettiń Ekonomika fakulteti dekanı T.Jiemuratov miynet haqqındaǵı nızam hújjetleri tiykarları, miynet bazarına say vakanciyalar izlew, jumısqa kiriw ushın rezyumeni tayarlaw, jumıs beriwshi menen sáwbetten ótiw usılları hámde talap etiletuǵın hújjetler menen tanıstırıp ótti. Ekonomika tarmaqlarınıń jetekshi qánigeleri hám ekspertlerin jámlep alǵan jaǵdayda jas kadrlardı kásipke baǵdarlaw, miynet bazarındaǵı aldıńǵı hám keleshektegi jaǵday, belgili kásipke, jumıs orınları hám jumıs beriwshilerge jetekshi kárxalarǵa tiyisli zamanagóy maǵlıwmatlar menen tanıstırdı.
Jıynalıs juwmaǵında XBB quramındaǵı mektep hám mektepke shekemgi mekemeler menen birgelikte 12 pitkeriwshi jas kadrlar ortasında shártnamalar dúzilip, jumıs penen bánt etildi hámde 10 pitkeriwshini basqa tarawlar boyınsha bántlikke kómeklesiw orayınan dizimge alınıp jumısqa jaylasıw boyınsha is-ilajlar islenip atırǵanlıǵın aytıp ótti.
